Bawion ko ang imong gugma

“Nagtuo ko nga dili kana ang hinungdan, Melvin,” ni Annie pa nga nagpadayon gihapong milaom sa relasyon nila ni Edelmar. “Unsa pa man diay laing hinungdan, An? Kun nagmahal pa siya nimo hangtod karon, di siya makaantos nga mabugto ang inyong komunikasyon sulod sa dugay’ng panahon.”

Wala makatingog si Annie. Ang gisulti ni Melvin mituhop sa iyang kaisipan ug nakaingon siya nga husto ang panahom sa ulitawo.

“Hikalimti na si Edelmar, An,” ni Melvin pa. “Ug dawata ang akong gugma. Nia ko nga andam kanunay nga magpangga ug magmahal kanimo.”

Gihinuktokan pag-ayo ni Annie ang gisulti ni Melvin kaniya. Kun bahin sa kamatinud-anon sa gugma sa ulitawo kaniya, dili na siya angay pang magduhaduha. Ang kataas sa kutay sa panahon sa pagpailob, pag-antos ug pagpaabot niini igo nang pruyba nga tinud-anay ang katuyoan niini kaniya. Ang lalaki nga dili tinuod nga nahigugma dili molahutay sa pagpangulitawo sa ingon niini nga gidugayon bisan makapila pa niya balibari.

Mibati na usab og kaluoy si Annie ngadto kang Melvin gumikan sa kadugay na sa panahon nga nag-antos kini sa pagpangulitawo kaniya. Gawas pa maikog na usab siya sa ulitawo gumikan sa dako nilang utang kabubut-on ngadto niini. Wala pa sila makabayad sa nautang nilang kantidad kang Melvin nga maoy gigasto sa pagpa-ospital sa iyang amahan dihang nadunggaban kini.

Apan dili kini balidong rason aron dawaton niya ang gugma ni Melvin. Hangtod karon si Edelmar pa gihapon ang gipitik sa iyang kasingkasing. Nagpabilin siyang naglaom sa pagbalik ni Edelmar bisan kun wala na sila’y komunikasyon. -- Sumpayan pa