Naghilak nga Bituon

Gula 18

Nasayod hinuon siya sa tanang kalihokan ni Ethan sa Sugbo pinaagi kang Gilda. Si Gilda maoy iyang informer bahin sa kalihokan ni Ethan. Kanunay kining mobalita kaniya mahitungod kang Ethan pinaagi sa cellphone.

Matud pa ni Gilda, kanunay niining awhagon si Ethan sa pag-text kang Jackie aron pagpangumosta kaniya. Apan molingolingo lang kuno ang ulitawo. Katarongan niini, mauwaw na kini kaniya tungod kay dili na sila magka-level. Mora bag gisuwawan si Ethan sa kasanag sa iyang bituon isip artista sa puting tabil. Walay epek ang iyang pagpa-charming ngadto niini.

Nahisagmuyo pag-ayo si Jackie. Nasayop ba siya sa pagpili sa dalan nga iyang gisubay nga midistansiya na man hinuon pag-ayo kaniya ang lalaki nga iyang gimahal sukad pa kaniadto? Kun nasayod pa lang unta si Ethan nga kini ang hinungdan kun nganong misulod siya sa showbiz aron makuha niya ang pagtagad niini, tingali masabtan na sa ulitawo ang tanan.

Karon ingon sa nagkagrabe na hinuon ang komplikasyon. Gawas nga layo si Jackie kang Ethan sanglit atua ra man ang ulitawo sa Sugbo ug siya ania sa Manila, misamot usab ka layo ang pagbati sa lalaki kaniya.

Gikan kang Gilda nakuha ni Jackie ang cellphone number ni Ethan. Siya na gayod ang unang mihagad sa pag-text ngadto kang Ethan. Makapila gayod siya mag-text kang Ethan apan wala gayod kini mo-reply bisan makausa. Mora ba’g maglikay si Ethan sa pagpakig-communicate kaniya. -- Sumpayan pa