Bawion ko ang imong gugma

Gula 62

 Padayon pang giatiman sa mga mananambal sulod sa emergency room si Noy Juan, ang amahan ni Annie, sa paghiabot nila sa Don Vicente Sotto Memorial Medical Center. Naghulat sila si Annie ug Nang Karing sa gawas. Gisaog sila sa tumang kabalaka. Walay kaseguroan kun maluwas si Noy Juan sa kamatayon.

Wala madugay, nakugang si Annie pagkakita sa usa ka lalaki nga nagsingabot. Si Melvin. Miduol dayon kini kanila.

“Unsa may kahimtang sa imong amahan?” Si Annie ang girumbo sa pangutana sa ulitawo.

“Naa pa sa sulod sa emergency room,” tubag ni Annie. “Delikado kaayo ang iyang kahimtang. Fifty-fifty ang iyang chance nga mabuhi.”

Wala motingog si Melvin. Mitutok kini kang Annie.

“Giunsa mo pagkasayod sa nahitabo?” Pakisayod ni Annie ngadto sa ulitawo.

“Si Agaw Lea ang nagsulti nako sa nahitabo,” maoy tubag.

Husto, nakaingon si Annie sa hilom. Naatol man diay nga didto si Lea sa ilang gipuy-an kaganina sa pag-abot sa iyang inahan nga nagpahibalo kaniya nga nadunggaban ang iyang amahan.

Wala madugay migawas ang doktor gikan sa emergency room. Gisugat dayon kini nila Annie ug Nang Karing. Nagpakisayod sila kun unsa nay kahimtang ni Noy Juan. Si Melvin misunod kanila.

“Kinahanglang operahan ang inyong pasyente,” nagkanayon ang doktor. “Andama na lang ninyong daan ang P10,000.”

Nagkatinutokay sila si Annie ug Nang Karing pagkadungog sa gisulti sa mananambal. Nasayod si Annie nga ang iyang gihunahuna mao usab ang diha sa hunahuna sa iyang inahan. Kahingawa ug kabalaka. Problema sa kuwarta! -- Sumpayan pa