Gikaintapan

Gikaintapan si Bruno sa ilang lugar. Siya ang maton sa ilang distrito sa siyudad. Walay magpaamang-amang pagsukol kaniya sanglit suhito siya sa lainlaing martial arts, sama sa karate, eskirima,ug uban pa. Dato o kuartahan ang pamilya ni Bruno. Nahigala ni Bruno si Poloy Pobre ang naulahi. Si Poloy ang mangingihaw og kanding sa karenderiya sa iyang iyaan. Pisaw (matang sa kutsilyo nga talinis, hait kaayo ug usa ray suwab) ang gamiton ni Poloy sa iyang trabaho.

Manghasi ug magbahis si Bruno inig kahubog na niya. Daghan ang mahisugamak sa iyang kabangis. Kadaghanan sa iyang mabiktima ang inosente nga mga tawo nga moagi sa ilang lugar. Ang daotan nga buhat ni Bruno wala malingla ni Poloy. Tungod niini...

"Undanga na intawon kanang imong gibuhat kay naluoy kaayo ko sa nabiktima nimo," usa ka higayon niana mitambag si Poloy ni Bruno. "Aaaa... pasagdi lang ko kay ganahan man ko!" singhag ni Bruno.

"Ayaw lagi tawon, Bruno, uy. Sahi ra god ... kun ikaw ang buhatan sa ingon, dili pod lalim."

"Aaaah ... ayaw lagi ko'g but-i ... atimana gani ang imong buhat. Pasagdi lagi ko! Mag-iyahay lang ta’g hikutar sa atong mga buhat...!" pinabundak ug pintok nga panapos ni Bruno.

Unya, usa ka bulanon nga gabii niana, nasigpatan ni Poloy si Bruno nga nagwandogwandog na sa kahubog. Nagbitbit kini’g ulisi (kahoy nga gamiton sa eskerimador).

Giduol dayon ni Poloy si Bruno aron tambagan paghunong sa naandan niining buhaton kun mahubog.

Pagduol ni Poloy, gikalitan kinig bunal ni Bruno sa iyang ulisi. Maayo nalang gani kay nakalihay ug midali kinig dagan palayo ni Bruno. "Imo diay kong unayon, Bruno? Paghuwat diha kay balikon ta ka....! mitublaw ang masuk-anong tingog ni Poloy sa mingaw'ng kagabhion.

Sa pagbalik na ni Poloy, nagdala na kini sa iyang pisaw. Ug sa walay kutikuti, kalit nga gihansak kini sa tiyan ni Bruno nga wala makabantay. Miinanay pagkalup-og si Bruno diha sa karsada nga milunang sa iyang dugo.

"Mirisi kang tawhana ka!" ni Poloy pa. Karon, maoy tinguha ni Poloy nga motahan sa kapolisan. (Kataposan)