Ang dwende nga higala ni Teryo

Human og latid ni Teryo sa dapit nga mao untay tukoran niya sa tangkal alang sa iyang mga manok nga igtatari, misugod dayon siya pagkawot para tarokan sa mga haligi, ginamit ang usa ka bara. Apan igo pa lang gani siyang nakadugsang og ka usa sa bara nga iyang gigamit, nakabati siya og usa ka matagming kaayong tingog nga daw nagagikan gyud sa ilawom sa yuta.

"Ayaw! Ayaw intawon gub-a ang among panimalay," nagkanayon ang maong tingog nga hilabihan katagming.

Gisuhid dayon ni Teryo ang gigikanan sa maong tingog. Ug sa tanto niyang suhid maoy iyang nakita ang usa ka gamitoy kaayong tawo nga taliwtiw kaayo og ilong. Nagkawo kini og usa ka kawo nga may pagka talinis ang tumoy. Ug mao usab ang tumoy sa sapatos niini.

Modagan na unta si Teryo aron sa pagpahilayo sa iyang nahimutangan.Kay nahadlok man siya sa iyang nakita. Dili man god usa ka ordinaryong tawo ang iyang nakit-an kun dili usa ka dwende.

Apan napugngan ang iyang pagdagan sa dihang nabatian na usab niya ang tingog nga nagkanayon "Ayaw kahadlok kanako kay dili ako mangunsa. Gusto gani akong makighigala kanimo!"

Tungod niadtong iyang nabati nagpabilin nalang si Teryo sa iyang nahimutangan ug nakig-estoryahay sa maong dwende. Hangtod nga nagkahinasa sila pag-ayo.

Pagkahibawo sa Dwende nga mahilig diay si Teryo sa pagpamuwang iya dayon kining gipasaligan nga tabangan aron kini modaug. Giingnan pa gani sa dwende si Teryo nga dili na mistil magbuhi pa siya og mga manok para igtatari. Ang buhaton nalang niya mao ang pag-adto sa buwangan ug mamili sa mga manok nga angay niyang pustahan. Apan kinahanglan magkuyog gayud silang duha. Ug ang Dwende ra maoy mopili sa angay nilang pustahan.

Tuod man, sa matag pamuwang ni Teryo ikuyog gayud niya ang dwende. Apan ang ubang mga tawo dili makakita sa higala ni Teryo. Siya lang gayud ang makakita niini. Ug sa matag pamuwang nila kanunay gayud silang modaug.

Tungod sa sige’g panaog nila ni Teryo sa buwang miasenso usab ang pagkabutang ni Teryo. Nakapatukod na gani siya og usa ka daku kaayong balay. Ug nakapamalit usab siya og daghang mga kabtangan.

Apan miabot ang higayon nga nasakit ang higalang dwende ni Teryo, ug wala na kini makakuyog kaniya sa mga buwangan. Si Teryo na lang gayud maoy namili sa mga manok nga iyang pustahan. Ug kanunay ra ba gayud siyang mapildi.

Tungod sa kanunay niyang pagkapildi nag-anam usab og kahurot ang kuwartang natigom ni Teryo. Hapit na sab gani mahurot ang iyang mga kabtangan kay iya man kining gipamaligya aron lang nga duna siya’y ikapamuhunan sa buwang.

Wala gayud maayo sa iyang sakit ang higalang dwende ni Teryo. Ug namatay gayud kini sa kadugayan. Ug tungod sa kamatayon sa iyang higala misamot usab ang kadimalas ni Teryo sa sugal kon sa buwang. Nga maoy nakapaut-ot kaayo kaniya.

Tungod kay hapit naman gayud mahurot ang mga kabtangan ni Teryo mihukom na lang gayud siya sa pagbiya sa sugal. Ug wa na gayud siya mamuwang pa. (Kataposan)