Sugilanong Legal Mogula matag Biyernes Depensa sa kaangso

Nanghupaw si SPO3 Tibon nga nagsud-ong sa giabugan na nga folder sa kaso ibabaw sa iyang lamesa. Usa ka tuig na nga pending ning kasoha. Way suspek. Busa wa gyud masulbad. Gisangunan siya sa

pagsulbad ini sa ilang bag-ong hepe sa pulis sa ilang lungsod sa Apaporis.

Kay gibatikos na sila sa media nga bisan man lang unta di sila kaproteher sa tanang tawo sa lungsod, at least, kun dunay patyon, masulbad nila ang krimen. Mataral sa hukmanan ang suspetsado. Nipasiklap siya sa dakong orasan sa bungbong sa ilang buhatan. Alas otso y medya sa buntag ang takna. Gipaphaan niya’s abog ang folder. Gipakli niya ug gisugdan og basa.

Alas sayis sa buntag niadtong bulan sa Mayo 22, 2010 sa daplin sa dalan Buna tungod sa punoan sa dako ug taas nga Makupa may tawong nahagba tungod sa punoan sa maong kahoy. Naglunang sa iyang kaugalingong ihi. Wa katiwas og pangihi. Wa kapanira sa iyang pundiyohan. Naagian siya sa mga traysikol drayber. Ug gi-report sa opisina sa pulis. Nagsul-ob og short pants nga maong ang tawo. Nag-T shirt og ukay-ukay nga minarkahan. Rubber shoes ang sapatos. May baseball cap sa iyang duol. Piho nga iyang kawo apan natangtang sa iyang pagkahagba.

Niresponde ang mga polis. May gamay'ng buslot sa bukobuko sa maong tawo. Wa kaayo ka dugo ang samad. Agi og bala sa armas de fuego nga gamay og kalibre. Sumala sa pakisusi sa mga polis, nailhan nga ang tawo si Engr. Gerry Ramos. Singkwentahon ang edad. Tig-hike siya kada buntag ngadto sa Poblasyon balig duha ka kilometro gikan sa iyang pinuy-anan sa baryo Caddo. Inig balik niya padulong sa ila, nabatasan na niya nga mangihi sa punoan sa Makupa. Daghang mga traysikol drayber ug mga habalhabal drayber nga nakakita niya kada buntag nga mag-hike. Wa gyu’y eye witness sa pagpusil.

Sumala sa autopsy report, through and through ang samad agi sa bala. Gikan sa sentro sa bukobuko duha ka dangaw ubos sa tangkugo ngadto sa sentro sa kutokuto usa ka dangaw ibabaw sa pusod. Nanghupaw na sab si SPO3 Tibon. Lisod gyud sulbaron ang maong krimen. Apan may nahunahunaan siya. Pamasin lang.

Nagpahimo siya’g dummy o maniquin sa samang gidak-on ug gitas-on sa biktima. Unya gipabuslotan niya ang bukobuko ngadto sa dughan sa samang paagiha sa trajectory sa samad sa biktima. Gidala niya ang dummy ngadto sa punoan sa Makupa. Giatol niyag gabii aron way daghang makakita sa iyang gibuhat. Gipabarog niya ang dummy sa samang posisyon nga nangihi tungod sa punoan sa kahoy. Unya iya gilili ang buslot sa dughan sa dummy. Kay sa iyang nakamahuan, two points connected would make an imaginary straight line. Nakita niya sa unahan tabok sa karsada ang bintana sa balay sa ikaduhang andana. Ug nibutok iyang dughan sa kahinam. Nagpakisusi dayon siya kun kinsa ang tag-iya o nagpuyo sa maong balay. Unya niaplay siya’g Search Warrant para sa maong balay.

Ang tag-iya sa balay si Atty. Ferdie Bueno apan wa magpuyo diha. Kasamtangang giabangan ni Dr. Ben Andal. Paghimo sa search sa maong balay nianang pagkabuntag sa sunod adlaw, nagpakuyog si SPO3 Tibon ni SPO2 Garol ug duha ka tanod. Nakuha ang Remington rifle nga lisensyado sa ngalan sa doctor. Gipa-ballistic sa polis ang pusil.

Pagkahapon nibalik si SPO3 Tibon ug SPO2 Garol sa balay giabangan sa doctor. Nagdala na sila og Warrant of Arrest alang sa doctor. Nakurat ang mga polis pagsulod sa balay. Kay nagtupad na sa doctor si Atty. Bueno. "Akong gitambagan ang doktor nga mosurender nalang. Apan naunhan mi ninyo. Busa ako siyang tambagan nga dili nalang mosupak nga arestahon. Hikayon lang nako ang piyansa alang niya," sa abogado. Gihatagan ni SPO3 Tibon si Atty. Bueno sa kopya sa Warrant of Arrest, ug ang doctor. Nitindog ang doctor aron sa pagpapusas.

"Self-defense man tong ako, Chief" sa doctor. "Kay ang kaangso sa iyang ihi moabot man god dinhi!” sa doctor. Awahi na sa pagsinyas sa abogado nga di siya patingogon. "Adto na lang sa husgado pangatarungan" ni SPO3 Tibon. Nakapahiyom nga nagpanglingo. (Kataposan) (Sa gusto’g libreng konsulta, dad-a ning pahina sa opisina sa tagsulat. Sa Sabado sa buntag)