Bawion ko ang imong gugma - Gula 58

Human matan-aw ni Annie ang tanang mga hulagway, mao nay iyang gisunod ang pagbasa sa sulat ni Edelmar kaniya. Sama sa naandan, nangumosta si Edelmar kaniya. Unya ang katibuk-an sa sulat naghubit na sa dakoan uyamot nga pagmahal niini kaniya. Mora’g mitambok sab ang kasingkasing ni Annie nga nakabasa sa sulat sa iyang hinigugma.

Igo lang nahuman pagbasa si Annie sa sulat, nabati niya ang tingog sa usa ka lalaki nga nangayo og katahoran didto sa gawas. Sinati na niya ang maong tingog. Si Melvin! Gidali-dali niya’g hipos ang mga hulagway ug sulat ni Edelmar. Dili siya buot nga makita kini ni Melvin.

Giablihan niya ang pultahan ug gipadayon si Melvin. Sa sala, nagsultihanay sila. Sa laing higayon, misukna si Melvin bahin sa gugmang gihalad niini kaniya.

“Lisod ba gyud diay kong higugmaon, An? Sukit ni Melvin nga ligdong kaayo ang panagway.

“Dili baya, Melvin,” ni Annie pa. “Ang imong kabuotan usa sa hinungdan nga dali ka rang higugmaon sa usa ka babaye.”

“Nan, nganong dili mo man ako higugmaon.”

“Tungod kay may gihigugma na ko. Dili mahimong pikason ang akong kasingkasing busa usa ray akong higugmaon. Mao nga gikasubo ko, Melvin. Dili gyud ko makadawat sa imong gugma.”

Milabay ang tulo ka bulan.

Nagmagul-anon na si Annie. Sulod niining maong gidugayon wala na magpadala og sulat si Edelmar kaniya. Wala na kini motubag sa gipadala niyang mga sulat. Sa iyang ihap, lima na ka sulat ang iyang gipadala ngadto niini apan wala kini balosi sa iyang hinigugma. -- Sumpayan pa