Ang ulahi nauna

Alas sayis sa buntag. Sabado. Ikaduhang niabot sulod sa Royal Charm Carwash Center sa Canduman ang sakyanan ni Atty. Charlie Gomez. Giatiman dayon ni Willy ug Freddy kay kusog mohatag og tip ang abogado. Apan ang maong pag-atiman plantalya lang.

Konohay giatiman dayon. Apan kanunay awahi mahuman ang paghugas sa iyang sakyanan. Wa may libog ang abogado. Kay inig abot magbasa man lang dayon sa mga magasin nga gipamutang sa lamesa sa huwatanan sa customer.

Usahay magdala sab siyag mantalaan ug nobela nga iyang basahon. Wa siya’y reklamo bisag awahi mahuman iyang sakyanan sa paghugas. Suki na ang abogado dinhi. Duna na siya’y discount card. Gihatagan siya ni Chona, ilang manedyer.

Nakauyon sila sa kinaiya sa abogado. Kay cowboy kaayo. Pag-instalar nila og videoke sulod sa carwash, nikanta dayon. Ang duha ka oras niyang huwat sa paghugas sa iyang Crosswind XUV nga puti, mora lang duha ka minutos. Nibayad siyag dos sentos pesos. P150 ang bayad sa carwash. P50 ang tip. Pwerteng lipaya sa mga sakop ni Chona. Hinoon sa kada abot niya, Sabado o Domingo sa buntag, siya kasagaran mauna. Unya moabot ang ikaduhang sakyanan. Wa lang siya’y reklamo nga bisag ang awahing sakyanan mauna og human og hugas. Naanad nalang sila nga awahi pirmi mahuman og hugas ang sakyanan sa abogado, bisag unang niabot.

Inig sinyas nila nga human na’g hugas ang sakyanan, wa lay tan-aw tan-aw kun maayo bang pagkahugas. Bayad dayon. Paandar dayon. Unya larga. Nasinati na nila ang sakyanan sa abogado. Kun molabay sa carwash center nga di magpahugas, mobusina nila. Ilang warawarahanan.

Karon, may niabot ikatulong sakyanan. Toyota Corolla nga abuhon. Pagkataudtaod may niabot nga mitsubishi Strada nga itom. Ilang gipasiklapan ang abogado. Duko la’g basa. Pero wa sila kamatikod nga magpasiklap panagsa nila. Kun gisigihan ba’g trabaho iyang sakyanan. Dangta’g usa ka oras, nahuman ang unang sakyanan nga Multicab nga asul. Nilarga. Laing usa ka oras nahuman ang ikatulong sakyanan. Nilarga. Laing usa ka oras nahuman ang Mitsubishi Strada. Nilarga. Usa ka oras pa una nahuman ang sakyanan sa abogado. Gisinyasan ni Chona. Daw gikulbaan siya kay nikunot ang agtang sa abogado. Gibundak sa lamesa ang magasin iyang gibasa.

Seryoso ang nawong sa abogado pagtindog. Nagkusmod. Giduol si Chona.

"Unsa man mo? Wa diay mo anang first-come-first-served dinhi?" pinabundak ang tono sa abogado.

"Sorry sir! Di man god kamao si Willy mogamit og vaccum cleaner" pasumangil ni Chona. Naglingolingo ang abogado. Niping-it.

"Ako, nagpaniid lang ko ninyo. Abi ninyo’g wa ko kasabut nga nag-abuso mo sa akong kaayo. Kamoa sab kong mobaliwala sa inyong abuso. May pasensiya ko. Sugot lang ko kun duha lang ka sakyanan. Akoy nauna, unya ipaawahi ninyog human. OK lang. Apan akoy ikaduha, unya unahon ninyo ang ikatulo ug ikaupat. Ang maayo ini, paawahi lang ko’g abut, aron mauna ko’g human! Ha!?" sa abogado. Malagoton. Isog ang tinan-awan ngadtong Chona."Sorry, sir!" ni Chona nga nangluspad ug gipaningot.

Nibayad ang abogado sa insakto. Wa na gyud mohatag og tip. Nihatag siyag tibook dos sintos. Apan gipangayo gyud ang sukli.

Naleksiyon si Chona ug iyang mga sakop. Sukad niadto, wa na gyud nibalik ang abogado. Nangita og laing carwash center. Hapit kada adlaw molabay iyang sakyanan sa carwash center nila. Apan di na mobusina. Di na gani molingi nila ang abogado. (Kataposan)