Gula 13
“Si Gilda ang mitug-an nako nga mag-on na kamo ni Joan,” matud ni Jackie. “Mora gani’g dili ko makatuo. Nasayod ko kun unsa kamo kaawayon si Joan kaniadto.”
“Tinuod kana,” ni Ethan pa. “Tingali ingon gyud niini ang kinabuhi, daghang twists and surprises. Sa kapulihay akong na-realized nga si Joan ang mas compatible nako. Gawas nga managsama kami’g kahimtang, pareho usab kami nga simple lang ang mga pangandoy sa kinabuhi.”
Mora’g natuok si Jackie sa gisulti ni Ethan. Kuwang na lang og diyotay nga dili siya mahiubos sa ulitawo. Lahi man gud ang iyang impresyon sa gisulti niini. Mora ba’g buot ipasabot sa ulitawo nga maong wala kini makagusto kaniya tungod sa katugbaw sa iyang mga pangandoy.
Apan gipakalma ni Jackie ang iyang kaugalingon. Nasayod siya nga ang diha sa iyang hunahuna dili gayod maoy buot ipasabot ni Ethan. Igo lang mipasabot ang ulitawo kun nganong nagkarelasyon sila ni Joan ug dili siya involved sa maong isyu.
“M-malipayon ko alang ninyong duha,” mikurog og diyotay ang tingog ni Jackie samtang namulong.
“Salamat,” mubong tubag ni Ethan.
“M-may cellphone ka ba?” Nangutana si Jackie.
“Oo.”
Giablihan ni Jackie ang iyang shoulder bag ug gikuha ang usa ka calling card. Gitunol niya kini ngadto kang Ethan.” -- Sumpayan pa