Bawion ko ang imong gugma

Gula 57

“Pero wa kay makuha gikan nako. Nag-usik ka lang sa imong panahon kay may hinigugma na ko. Di na mahitabong mahigugma pa ko sa lain tungod kay nagsabot na kami si Edelmar nga inigpauli niya gikan sa London, magpakasal na kami.”

“Wa koy gahom pagpugong sa inyong desisyon kun mao kanay inyong gikasabotan. Apan samtang di pa kamo makasal, di sab ko mohunong sa pagpamasin.”

Wala motingog si Annie. Iyang natugkad ang kamatinud-anon sa gugma ni Melvin kaniya. Sulod sa taas na kaayong kutay sa panahon nag-antos ug nagpaabot si Melvin. Apan dili gayod niya kabugtian ang gugma ni Melvin kaniya. Si Edelmar maoy tag-iya sa iyang kasingkasing.

“Anaa ra kana kanimo, Melvin,” ni Annie pa. “Basta kay nasayod ka na nga wa ka gyu’y mapaabot nako.”

Nakadawat na usab og sulat si Annie gikan kang Edelmar. Nahinangop pag-ayo ang dalaga. Uban sa sulat sa hinigugma may gisukip nga mga hulagway niini nga nakuha didto sa London. Ang tanang mga hulagway may gisulat nga caption sa luyong bahin nga nagtug-an kun diing dapita nakuha ang maong hulagway.

Dihay hulagway nga kauban ni Edelmar si Melinda, ang giingon sa iyang hinigugma nga suod nga higala niini. Hitsuraan diay usab si Melinda. Apan sa postura niini segun sa nakita ni Annie sa hulagway, mora’g may pagkalakin-on kini. Bisan sa hulagway lang namatikdan ug matataw nga may bulok kini sa pagka-lesbian kun maoy basehan ang pamiste niini. -- Sumpayan pa