Human sa "flag ceremony" nanaglumbaay dayon kami sa pagpamalik paingon sa among "classroom". Isig dumdom dayon kami sa among tagsa-tagsa ka mga lingkuranan.
Kay ako man maoy kinatas-an sa tanan diha sa among klase, ako maoy gipahimutang ni Miss Aira Ornopia, ang among maestra sa grade three, sa likod nga bahin sa nanaglinya nga mga desks. Nag-inusara lang usab ako sa paglingkod, kay wala man akoy katupad. Unsaong wala man magpares ang among gidaghanon. Bayente-nuybe ra man kaming tanan mga grade three nga anaa ubos sa pagdumala ni Miss Ornopia.
Nakuntento nalang usab ko sa akong nahimutangan. Kay gawas nga makita ko gayud ang tanan nakong mga klasmet, nga anaa managlingkod sa may atubangan nga bahin, makalantaw usab ako sa gawas. Lakip na gani sa ubang mga kuwarto ug ang opisina sa among "school principal", nga si Mr. Adrian Lomotan.
Kay maayo man kaayong motudlo si Miss Ornopia, dali ra kaayo kong nakat-on sa among leksyon. Maminaw man sab god ko kanunay sa among maestra. Ilabi na kay ganahan man sab kong magsud-ong sa iyang nawong. Guwapa man god kaayo si Miss Ornopia. Mora gyud og si Angel Locsin. Dako pa lang tingali ko, basin og naulitawhan ko na siya.
Usa ka higayon niana, na-late ko sa pagsulod sa among klase. Gisugo man gyud ko ni lola Lucing sa pagpanukot sa mga nakautang kaniyag tuba. Kay iya kunong ipangompra ang mga kuwartang akong masukot.
Nahibulong nalang ko kay sa paghiabot gayud nako sa akong permamenteng lingkoranan, diha namay naglingkod. Pupareho ra tingali kini kanako’g gitas-on. Ugaling kay tambok lang kaayo kini. Ug puti pa gayud kaayo’g pamanit. Pino pa ra ba kaayo og kutis. Dili sama sa ako nga may pagka gansang-gansangon. Miliwat man god kuno ko kang lolo Delio. Ang akong apuhan.
Napikal kaayo ko kay wala gyud dayon moirog ang maong bata aron unta ko makalingkod. Diha pa lang kini moirog sa dihang giingnan kini sa among maestra nga pairogon. Apan miirog man tuod kini nga kusmod kaayo ang nawong. Mora pa gani og nangyamiid kanako.
Sa dihang gipaila na ni Miss Ornopia ngari kanako ang bag-o kong katupad, diha pa ko mahibawo nga anak diay sa tresurero sa lungsod ang maong bata. Mibalhin diay kinig tungha diha sa klase ni Miss Ornopia tungod sa hangyo sa amahan niini. Nga suod ra usab kaayo sa among maestra.
Nagtupad man tuod kami ug ang bag-o nakong klasmet, apan wala gayud kami magtinagdanay. Wala gani usab kami magtinan-away sa usag-usa. Wala ko nalang usab kini hatagi’g pagtagad ug gibubo ko na lang ang tanan kong mga pagtagad ngadto sa among maestra nga nagsigi’g leksyon kanamo.
Sa naglakaw na ang mga adlaw, akong nahibaw-an nga bulakbol diay kaayo sa klase ang bag-o nakong klasmet. Nga ginganlan og Bernard. Kadaghan na diay kini magbalik-balik sa grade one. Ug duha pa gani kini ka tuig sa grade two. Una pa kini mag-grade three.
Usa ka higayon niana, naghatag og pasulit si Miss Ornopia sa usa sa ilang mga "subjects". Namatikdan nako nga gusto gyud untang mokopya kanako si Bernard. Gani, mianam kinig sikit kanako sa paglingkod. Apan kay gitabunan ko man ang papel nga akong gisulatan sa akong mga tubag, wala gayud kini makalugar sa pagpangupya.
Sa kadugayan, akong namatngunan nga ang usa niya ka tiil nagsigi’g kuhit sa akoa. Ug sa dihang gitan-aw ko siya mikimod siya kanako ug morag nangilyupo aron ako siyang pakopyahon. Gani, nagpakitakita pa siya sa iyang pitaka.
Ug kay mamugos naman gyud siya maong ako nalang siyang gipakopya sa akong tubag. Naapil pa gani unta niya sa pagkopya ang akong ngalan, isip usa sa mga tubag. Maayo nalang gani kay namatngunan ko dayon kini. Ug nabadlong ko dayon siya.
Human sa among pasulit, may gitunol si Bernard kanako. Dili kini kuwarta, apan usa ka butang nga giputos og plastik. Dili ko unta kini dawaton apan mamugos man gyud siya maong gidawat ko nalang usab. Usa diay kini ka pan nga dunay gipakapin nga "juice". Para tingali to sa iyang snacks.
Sukad niadto, nakigsuod na kanako si Bernard. Kanunay na ko niyang dad-an og mga pagkaon. Usahay hatagan ko niyag kuwarta. Ug agi’g bawos niini, kanunay ko siyang pakopyahon kun duna kami pasulit. (Kataposan)