Ang buhok ni Ely Bueña

J.S Prom Night sa Energizer National High School. Iyahay'g pagwapohay ug pagwapahay ang mga magtutudlo. Wala usab papildi ilang mga estudyante. Nagpabonggahay sila sa ilang gipangsul-ob nga beste. Mora’g motambong ug FAMAS, OSCAR Award.

Ang mga babaye iyahay'g panindotay sa ilang make-up. Adunay nasobrahan sa blush-on, pwerteng puwaha sa nawong morag baboy'ng aslonon, labi na kay tambok og lawas.

Adunay nasobraha’g paseksi pinasihag ang bra ug panty nga nakapatikig sa ikog sa mga lalaki daw nagpanghagad og "RAPE ME"nga pahilak-hilak dayon igkahuman.

Sus! napa gyuy ga-fitting nga wa gyud raba mo lakra ang panty ug bra, ngabil pwerteng pulaha mora’g burikat sa Sanciangko'g Junquera.

Wala usab papildi ang mga bayot sa ilang gipangsul-ob nga pang-Miss Universe ang gown, step in nga tag-as kaayo’g takong. Dunay nabalian ug natikalong nga mipahiyom lang sad dayon kay nakakupot sa kamot sa usa ka bayongbayong nga eaterer boy sa Dogero Catering Services nga linga sa pagpahimutang sa mga siya, lamesa, mga pagkaon ug softdrinks uban sa iyang mga kaubanan.

Wala usab papildi ang mga estudyanteng laki sa ilang pa-pogi. Adunay de-kurbata, de-antyuhos, de-amerkana, de-sapatos, de-barong nawong mora’g mibangon gikan sa lungon.

Nindot usab ilang gipangsul-ob nga slacks, kordoroy ug blue jeans pero wa diay ka-brief tungod sa ka excited. Gituyo pod sa uban namasin nga makabitik ug tsiks o sa ilang mga uyab nga madala sa mangiob nga unahan. Nindot usab ang ilang mga buhok nga nagkalain-lain ang style ug gidihog.

Apan way nakalabaw sa buhok ni Ely Bueña pagsud niya sa gate sa eskwelahan sakay sa Nike Air nga sapatos nga nagsambilay og sista. Mokanta siya karon sa stage og "Huling El Bimbo" sa Eraserheads nga Banda. Sinaw kaayo ang iyang buhok nga itom. Lahi sa kaniadto nga way panudlay ug galago lang. Ang kasinaw sa iyang buhok way kalainan sa iyang gisul-ob nga itom nga amerkana, itom nga slacks ug itom nga pang-desente nga sapatos.

Mosidlak kong maigo sa kahayag sa sugang dagitabnon. Pwerteng kahingangha sa iyang mga teachers, classmates ug schoolmates nga nakakita.

"Sinawa’g buhok, a! Unsay gihiso nimo ana, Dong El?" Matud ni Sir Mirpoten. Maestro niya sa Chemistry.

"Tag-ana. Bright bitaw ka’g Chemistry." Milutaw ang komedyanteng pahiyom ni Ely Bueña.

"Gatsby na, sa?' Game pod ang Maestro.

"Wa katag-an."

"Suave na, no?" Nangawot sa ulo ang maestro.

"Di gihapon."

"Pamada." Nangawot sa mata ang maestro.

"Unsay pagtuo nimo, tiguwang!"

"Baby oil, na gyud na?" Nangawot sa simod ang maestro.

"Unsay pagtuo nimo sanggol na walang alam?"

"Unsa man diay gidihog nimo, Bay?" Morag nasuko ang Maestro "Nga pwerte mang sinawa sa imong buhok?"

"Shoe polish gud! Bangaa nimo magpagwapo, uy!" Ni Elybueña, dayong dagan padung sa buffet table nga gisugdan na’g blessing sa ilang Principal Akaon. Misunod usab pagpanglakaw ang mga schoolmates ug classmates ni Ely Bueña nga nanagkatawa nahimuot sa iyang komedya.

Biniyaan si Sir Miroten, nga nakapangawot sa iyang bugan. Naglingo-lingo sa kasuko. Nagpangawot sa iyang ilong ug baba human makadungog sa singgit sa Principal "Let's do eat!" (Katapusan)