Ang Kapalaran

Gula 2

Gituyo ni Alex nga usa mokaon sa iyang paniudto. Wala pay ala una sa hapon nagpaatbang na siya sa tindahan nga gitrabahoan ni Liza.

Ala una kinse nakita niya nga migawas na si Liza sa tindahan. Iya dayon kining gisitsitan, sa wala niya duola. “Naghuwat ka g’yud diay nako Lex?” daw wala makatuo si Liza nga tinud-on ni Alex nga makigpanuroy kini kaniya.

“Mangaon usa ta Liz, adto ta anang naay kan-anan sa unahan,” gitudlo ni Alex ang kan-anan nga nahimutang dili kaayo layo sa ilang nahimutangan. Human sa ilang pagpangaon.

Walay hunong sa pagtutok si Alex kang Liza. Nabantang na g’yud sa iyang panan-aw nga maanyag kini. Sa una nilang panagkita kaganina nagsul-ob pa man si Liza ug hair cap. Karon nga midunghay na ang iyang buhok, milutaw na gayud ang kaanyag ni Liza.

“Nindot kuno suroyan ang baybayon diha sa dapit sa Kilometer 47 sa Catmon Liz, nakaadto ka na ba diha?” daw nagpasabot si Alex kang Liza nga gusto kini nga makigpanuroy didto.

“Wala pa ko makaanha diha apan giingnan ko sa akong mga amiga nga nakaanha na diha nga nindot kuno kaayo ang maong baybayon nga nahimutang ilawom sa pangpang,” ni Liza pa. Nagkasabot ang duha nga mangadto sa maong baybayon. Misakay sila’g jeep. Bisan og wala sila’y relasyon apan daw nagkasabot na ang ilang mga pagbati. Gaan kaayo ang ilang buot sa usa’g-usa.

Pagkanaug nila ni Alex ug Liza sa ilang gisakyan didto sa Kilometer 47, nadani kaayo sila sa kaanindot sa talan-awon. Ang dagat ilang gidung-aw sa ubos sa pangpang, ug didto sa halayo nakita nila ang isla sa Camotes.

Hinay sila nga nanaug paingon sa baybayon subay sa hagdan-hagdan. Gigunitan ni Alex ang bukton ni Liza nga mainampingon kaayo sa iyang mga lakang. Tuod man, miabot ra sila sa kinaubsan.

“Wow, kanindot sa dagat!” nakatuaw si Liza dihang nakita niya ang tin-aw kaayo nga tubig sa dagat ug ang mga bawod nga mitapya-tapya sa lapyahan sa baybayon.

May nakita sila nga lantay didto sa unahan. “Tana Liz, adto ta didto manglingkod.”

“Kwak! Kwak! Kwak!” kalit lang may mitingog sa duol nga kakahoyan ug wala tuyoa ni Liza nga nahagakus siya ni Alex sa kakuyaw. (Sumpayan)