Gahi pa sa tul-an sa kabaw kun maoy lat-an

Wa nay sama kaburingog nimong pagka-babaye ... Porlang, nga makigminyo kang Oming ... nga nagkango-kango naman lang gani gumikan sa pagka-tiguwang? misinggaak sa tumang kalanog si Uray Imak nga milagbas sa kinatibuk-an nilang silingan ning ilang balangay sa Bugho.

"Bahala na lang sad nga magpabilin kang dalagang guwang, kay sa mamana ka nianang Oming nga madakin-as nalang gani kun makatunob sa ihi sa iring!"

Igo na lamang gibawsan og yuhom sa pahiyom ang inahan ni Porlang.

Usahay makaingon siya sa iyang kaugalingon ... nga insakto baya usab ang giingon kaniya sa iyang inahan nga taudtaod na nga nabiyuda ni anhing tatay niya Igong?

Apan bisan giunsa niya og hunahuna ... sa iya karong kagulangon ... nga may kalim-an na og walo ang iyang panuigon ... kinsa pa man tuod ang mangurso niya og panguyab nga naputos na man gani ang iyang nawong sa nagsapaw nga kunot?

Wa lang tuyoa ... inanay mipasunding sa may ngilit sa panumdoman ni Porlang, kun ngano nga sa diha pa siya sa kadingding sa iyang kabatan-on ... sobra ra man gayod niya ka aristokrata sa mga lalaki nga mangindahay sa iyang gugma?

"Ipasalig ko kanimo Porlang ... nga bisan sa akong pagka-tiguwang ... imo gihapon hitagamtaman ang sobra nga katagbawan kun ikaw magpakasal kanako!" hapit na lang moluhod sa iyang atubangan si Oming sa dihang gidigahan siya sa iyang inantigong inamoralan.

Ambot og ngano nga nalukmay man siya sa tiguwang niyang maghahalad ug gikatakda dayon ang adlaw sa ilang kasal.

Sa gabii human sa ilang kasal iyang gihunghongan si Nanay niya Imak, diin siya nagkanayon:

"Panguyawan man Ako Nay Imak, basin masubrahan ako og digamo ni Oming? Kuyaw sa bughat?"

Igo lamang mibahakhak si Uray Imak ug nagkanayon:

"Imposible kaayo Porlang nga ikaw mabughat ... nga nakaseguro gayod ako nga bugnaw pa sa simod sa itoy kanang armas ni Oming!"

Sa dihang diha na silang duha sa may sulod sa may sibay kalit lang misinggit og pakitabang si Porlang diin siya nagkanayon:

"Tabanggggg .... intawon .... Nayyyy .... Imakkkk .... kayyyyy ... anggggg .... buhiiii .... niiii Ominggggg ... gahiiii ... paaaa ... saaaa tul-annnn .... saaaaa ..... kabawwww .... konnnnn .... maoyyyy ..... lat-annnnnn!" (Kataposan)