Bawion ko ang imong gugma

Nagkatinutokay sila si Annie ug Edelmar. Taudtaod gayod ang pagbinag-iray sa ilang mga panan-aw. Walay mga pulong nga nanglugwa sa ilang baba apan daw may mga pulong nga gipasupot pinaagi sa ilang tinan-awan. Ug daw nagkauyon ang ilang mga kabubut-on pinaagi lang sa kinidlap sa ilang mga mata.

Mipara si Edelmar og taxi. Nanakay dayon sila. Unya gihunghongan ni Edelmar ang drayber kun asa sila magpahatod.

Sulod sa mabugnaw’ng lawak sa usa ka hotel nga nahimutang sa uptown, nisangko sila ni Annie ug Edelmar. Wala mopakita bisan diyotay na man lang nga pagtutol si Annie sa gibuhat ni Edelmar kaniya.

Kabubut-on niya ang pagkuyog sa iyang hinigugma ning maong dapit. Sa wala pa niya himoa ang maong desisyon, iya kining gitimbang-timbang sulod sa pipila ka gabii nga kulang siya’g kinatulgan. Hangtod nga natibuok ang iyang hukom sa pagtugyan sa iyang kaugalingon ngadto kang Edelmar sa dili pa kini mogikan paingon sa London. Wala siya masayod kun makataronganon ba kining iyang gihimo. Ang iya lang natugkad mao nga uyon kini sa iyang kabubut-on.

Daw dihay kapid-an ka boltahe sa kuryente ang mikuyamang sa kalawasan ni Annie samtang giukoban ni Edelmar ang iyang mga ngabil.

Wala siya’y laing mahimo gawas sa paggakos og hugot kaayo ni Edelmar samtang hugot sab niyang gipiyong ang iyang mga mata ug nagpamahit sa iyang mga ngabil gumikan sa dili ikahubit sa pulong nga kalalim nga iyang gipamatyag. -- Sumpayan pa