Ang tulo ka tawo

Sayo pa gani sa buntag milanog na ang tingog ni Anabel. “Maayo pa og molayas ka dinhi. Wa kay probitso nga pagkabana!” “Oo, molayas ko kay gipul-an nako sa imong tagawtaw,” mitubag ang bana nga si Anselmo.

“Naunsa ba mong duha, pa ug ma, nga magsige na man lang mo og away,” dayong gawas sa ilang dyes anyos nga anak babaye. Miadto kini sa kakahoyan dili layo sa ilang balay. Didto nagdanguyngoy kini. “Di na ko mouli sa amo kay magsige na lang og away sila sa papa ug mama.”

Bisan gibati na og tumang kagutom ang bata, wala na kini mouli sa ilang balay. Gipangita kini sa magtiayon hangtud nga nangutana ang bana. “Nganong milakaw man to?”

“Unsaon man kuno nga magsige man lang ta og away.”

“Basin tua to sa kalibonan, atong adtoon kay hapit na ra ba mongitngit.”

“Tana,” ug nagkuyog ang duha padulong sa kalibonan. Samtang didto sa kalibonan, may mitungha nga engkantada.

“Inday, pauli nalang sa inyo kay gipangita ka na sa mga ginikanan mo. Ayaw kaguol mahitungod kanila kay hatagan ko kamo og ganti. Sige, lakaw na.”

Busa mipauli ang bata ug hisugatan kini sa iyang mga ginikanan. “Diin ka ba paingon?” matud sa inahan.

“Sige, mamauli na ta kay magluto pa ta sa atong panihapon,” matud sa bana.

Igo lang silang nahuman og panihapon may nanuktok ug sa pag-abli sa asawa. “Hain man ang imong bana?’ nangutana ang usa sa tulo ka tawo.

“Naa sa sulod,” tubag sa asawa, “panulod kamo.”

“Di mahimo nga magdungan mi og sulod. Usa lang ang inyong pilion. Ako diay si Mr. Bahandi ang maghatag og bahandi. Kining akong tupad, si Mr. Kalamposan ang maghatag og kadaugan. Kadtong tua sa likod, si Mr. Paghigugma. Siya ang mopuno sa paghigugma ug pagmahalay sulod sa inyong panimalay. Pangutan-a lang ang imong bana kun kinsa ang gusto niyang pasudlon.”

“Kadiyot lang kay ako siyang sultihan.”

Didto sa sulod, human kasultihi ang bana. “Si Mr. Bahandi lang ang pasudla aron madato ta.”

“Ayaw, pa,” matud sa anak, “si Paghigugma nalang aron mapuno sa kalipay ug paghigugma ang atong panimalay aron di na mo mag-away si mama.”

“Na, hala, sige, si Mr. Paghigugma nalang ang pasudla.”

Apan pagsulod ni Paghigugma, misulod usab sila si Bahandi ug Kalamposan, busa mipahayag si Paghigugma. “Kun ang gipili ninyo, si Mr. Bahandi o kaha si Mr. Kalamposan, mahibilin ang duha sa gawas. Sanglit ako ang gipili ninyo, kinahanglan mosulod ming tanan sanglit kun hain ang paghigugma, naa usab ang kalamposan ug bahandi. Maayong pagkapili.” (Kataposan)