“S-si Ethan,” may pag-ukon-ukon ang sinultihan ni Jackie. “Nakabalita ka pa ba bahin kaniya?”
“Oo,” ni Gilda pa. “Kanunay man ming magkita kay security guard man siya sa bangko nga akong gitrabahoan.”
“Diay ba? K-kumosta na siya? A-ang iyang lovelife?”
“Sa akong nasayran, si Joan ang iyang girlfriend karon.”
Mora’g natuk-an si Jackie sa iyang nasayran.
Nabatyagan ni Jackie nga ingon sa mihuot ang iyang dughan. Nakaila siya kang Joan. Ila kining silingan sa Guadalupe ug anak sa usa ka PUJ driver. Si Joan diay ang nahimong girlfriend ni Ethan, ang lalaki nga nakakaplag og luna sa iyang kasingkasing sulod sa dugay nang panahon. “Hangtod ba diay karon. Day, naghandom ka lang gihapon kang Ethan?” Sukit ni Gilda nga mitutok pag-ayo kaniya.
“Childhood crush nako si Ethan, Day,” ni Jackie pa. “Dili siya malangkat sa akong kasingkasing sa dakong kasayon. Dugay na kong nangandoy nga magkatakdo ang among mga pagbati ugaling lang kay wala gayod siya magtagad kanako.”
“Cheap ra man tingali kaayo, Day, kun ipamugos mo ang imong kaugalingon ngadto kaniya?”
“Dili nako idudho ang akong kaugalingon kaniya. Ang gusto ko lang mahitabo mao nga hatagan ko niya sa iyang atensiyon.”
“Oh! my goodness! Nganong siya man gyud, Day? Sa imong kasikat karon, daghang mga prominent personalities nga interesado nimo. You can even buy love if you want to.” -- Sumpayan pa