Naghilak nga Bituon - Gula 5

Igo lang silang nahuman og panihapon, nahiabot si Gilda, ang suod nga higala ug classmate kaniadto ni Jackie sa nagtungha pa sila sa kolehiyo. Wala makatapos si Jackie sa pagtuon tungod kay nahingag sa stardom. Si Gilda nag-alagad na karon sa usa ka bangko sa Sugbo.

Naghangpanay ang duha diha sa sala. Gitanyagan ni Jackie og panihapon ang dalagang higala apan mibalibad kini.

“Maayo kay nakahunahuna ka sa pagpakigkita kanako karon,” matud ni Jackie.

“Nagplano baya unta ko nga mobagat na lang nimo didto sa CICC ugma,” ni Gilda pa. “Pero nausab ang akong hukom. Nabalaka ko nga tingalig dili ko makapaduol nimo ugma. Nakaseguro kong hugopan ka gyud sa daghang mga tawo. Sikat ka na man gud kaayo.”

Igo lang mipahiyom si Jackie sa gisulti sa iyang higala.

“Kumosta na man ang kinabuhing artista?” Sukit ni Gilda.

“Okey ra man,” ni Jackie. “Tinuod nga samok kaayo ang kalibotan sa showbiz. Dili ka gyud makalikay sa tsismis ug intriga. Sa sinugdan, union skin kaayo ko. Pero karon naanad na ko. Gidedma na lang nako ang mga intriga.”

“Sa tan-aw ko, misamot ka’g kaguwapa karon nga usa ka na ka artista.”

“Puhonan ni nako, Day, sa akong showbiz career.”

Kahilom.

“K-kumosta na man diay tuod si...”

“Si kinsa?” -- Sumpayan pa