Inosente

Gula 2

Gisugat sila si Max ug Tiyo Berto ni Ronnie, ang floor manager sa Sanciangko’s Wildflower dihang misulod na ang duha sa main entrance sa bar.

“Welcome Sir…uy Max dugay-dugay ka na g’yud nga wala makabalik dinhi,” matud sa floor manager nga mi-guide kanila paingon sa usa ka lamesa nga bantang kaayo sa stage. “Daghan na kaayo nga mga bag-o Max,” dugang ni Ronnie.

Misinyas dayon si Ronnie sa usa ka waiter nga ipaabi-abi ang duha nila ka customers. Namatikdan ni Max nga walay pupamilok si Tiyo niya Berto nga nagsud-ong sa mga dancer nga nagsayaw nga two-piece, ilabi na kun panagsa tukason niini ang iyang panti.

“Ginhawa usa Tiyo!” gikomedyahan ni Max ang uyoan. “Unsa, sultihi ra ko ha kun may makursonadahan ka sa mga dancer kay akong ipatupad nimo,” matud ni Max.

“Tinuod ka Dong, pwede nga itupad nato kanang mga guwapa kaayong dancer?” daw wala motuo si Berto sa gisulti sa pag-umangkon. “Basta sultihi ra ko Tiyo kun hain kanila ang imong magustohan.”

Taud-taud, nangablit na si Berto sa iyang pag-umangkon. “Kanang sihag-sihag ang sinena Dong korsunada nako na. Kalami g’yud gakus-gakuson anang babayhana uy,” daw nagpanilap si Berto nga walay hunong sa pagtutok sa dagway sa dancer.

Gisinyasan dayon ni Max ang waiter. Iyang gisugo nga paduolon kaniya ang floor manager. Diha dayon si Ronnie. “Inighuman og sayaw anang maong dancer paaria sa lamesa Ron kay akong ipa-table ni Tiyo. Ingna nga ipalingaw og maayo ang akong uyoan kay ako ray bahala,” giingnan ni Max ang floor manager.

Tuod man, taud-taud human nga misayaw ang dancer, miduol na kini sa lamesa nila ni Max ug Berto. Gisinyasan dayon ni Ronnie ang batan-ong dancer nga motupad ni Berto. “Lingawa pag-ayo Day kay si Max ra ang mag-igo nimo, maayo na mohatag si Max day.”

Milingkod dayon ang dancer tupad ni Berto. Gitanday dayon niini ang iyang paa sa paa ni Tiyo Berto nga daw nakuratan sa gihimo sa babaye. Giparaygan dayon sa batan-ong dancer si Berto. Wala makabantay ang uyoan nga gisinyasan ni Max ang babaye nga ipalingaw siya pag-ayo.

Gilingi ni Berto ang pag-umangkon apan gisinyasan ra ni Max ang uyoan nga romansahon ang dancer. “Dili kaha masuko kining dancer Dong kun akong hawkan sa aping?” (Sumpayan)