Dili matugkad ang kalawom

Kun ang kataas sa utong ang hisgotan, mahimong hitupngan si Nisyo apan dili hilabwan. Magsangkiig gud kini og mao na ang mamana og kugita, ilabi na gayod sa mga isdang mulmol ug kitong.

"Kasuwerte god nimo Digna nga nakabana ka og maayong laki nga mamana og kugita ug isdang kitong!" ni Kumare pa niya Ines nga nagkasugat silang duha sa may simangan nga dalan.

"Baya na man si Kumpare nimo Tinong ... maglisod gani og tugkad sa usa lang ka dupa nga giladmon!"

Imbis bawsan ni Digna og yuhom sa iyang pahiyom si Kumare niya Ines, mikalit lang pagkisdom ang iyang nawong?

Ning ilang balangay sa Lawis, nga dili halayo sa baybayon ning ilang lungsod sa San Fernando way mga mananagat nga wa masuhito sa kataas sa utong ni Nisyo. Kun mahimo iya god nga tugkaron ang giladmon sa dagat nga agianan sa barko.

"Unsa man tuod Kumare Digna ... nga makatugkad man si Kumpare Nisyo, bisan unsa kalawom?" nangarisgar na usab og pangutana ang iyang Kumare. Taudtaod nga wa makatubag si Digna. Ang iya lang nahinumdoman nga gi-sekrito siya ni Nisyo, nga gipaagi lang og hunghong nga ang iyang tuong dunggan adunay lungag nga daw hasang sa isda.

"Mao kini ang bugtong hinungdan Digna nga bisan tulo pa ka oras nakong sinawom sa dagat sa panahon ako mamana og kugita, matugkad ko gayod og tidlom ang giladmon sa dagat gumikan sa kataas sa akong utong!" ni Nisyo pa nga gitug-anan nganong makatugkad siya bisan unsa kalawom ang dagat.

Gabii kadto sa adlaw'ng Sabado. Nabuntagan si Nisyo, nga namana. Ambot unsang pagkaunsaa ... nga gumikan ba kaha sa kabag-ohay pang nanagtipon si Nisyo ug si Digna, isip magtiayon, giabot man og dili tiaw nga kahidlaw nga kanunay na lang mabuntagan sa pagpauli ang iyang bana nga mamana.

"Hain may mas maayo Nisyo ... nga mopahuway una ka og pamana ugma, bisan usa lang ka adlaw?" luhaan ang duha ka mata ni Digna nga misugyot sa iyang bana.

"Anugon kaayo Digna ... ang panahon ... diin hasta ang mga mulmol, anad kaayo nga panaon kay nagluklok sa may samo!" daling tubag ni Nisyo.

"Hala kay dili man kaha ka mopahuway sa pagpamana ... sulayi kuno og tugkad ang giladmon ubos sa akong bilahan?" kalit mibilangkad si Digna atubangan sa iyang bana.

Igo lamang naglingo-lingo si Nisyo ug nagkanayon:

"Bisan sa kataas sa akong utong Digna ... dili ako makatugkad sa giladmon sa ubos sa imong bilahan!" (Kataposan)