Inosente

Gibisitahan ni Max ang iyang mga kabanay didto sa Barili. Bukid-bukid na gayud ang gipuy-an sa iyang mga kabanay ug ang uban sa iyang mga uyoan wala kaayo masuheto dinhi sa dakbayan.

“Dong Max, sukad-sukad Dong wala g’yud ko makakita nianang giingon nila nga hubo-hubo nga talan-awon sa siyudad. Gusto unta ko nga makakita ana Dong, matabangan ba ko nimo?” matud sa uyoan ni Max nga si Berto.

Gisud-ong ni Max ang dagway sa iyang uyoan ug nabana-bana niya nga tinuod gayud nga inosente kini sa mga talan-awon diha sulod sa mga imnanan nga dunay babaye nga magsayaw.

“Ingna lang si Tiya Conching nimo nga imo kong pabisitahon sa siyudad Dong. Ayaw tug-ani sa tinuod nakong tumong,” nagngisi si Tiyo Berto nga mihatag og ideya sa iyang pag-umangkon.

Tuod, milampos si Max pagkombinsir ni Tiya Conching nga paubanon si Tiyo niya Berto sa siyudad. “Basin og mawala na didto si Berto Dong ha, kausa ra g’yud na nga nakaadto’g siyudad,” matud ni Tiya Conching.

Naghinam-hinam g’yud si Berto nga makakita sa giingon niyang hubo-hubo. “Paita Dong Max, wala g’yud ko makakita og laing lawas sa babaye Dong gawas anang maligo diha sa sapa nga mohulma ang lawas sa isul-ob nilang daster,” matud ni Berto nga nakapanglingo-lingo.

“Ayaw kabalaka Tiyo, ako’y mahibalo nimo didto sa siyudad. Kaon daan og daghang mga pagkaon nga maglaputay sama anang okra, sabana, kaimito kay para malingaw ka g’yud,” nagpahiyom si Max nga mitambag sa iyang uyoan.

Plano ni Max nga dad-on ang iyang uyoan sa Sanciangko’s Wildflower kay sigurado g’yud kini nga magtulagak ang laway nga magsud-ong sa pasundayag.

“Isuroy tika Tiyo sa Sanciangko’s Wildflower kay mga gwapa kaayo ang mga tsikiting didto,” matud ni Max.

Daw mitingkag ang dunggan ni Tiyo Berto pagkadungog sa pulong Sanciangko’s Wildflower. “Sige” Dong, mao usab kana ang gisulti sa akong mga amigo dinhi nga nakaadto’g siyudad nga nindot g’yud kuno suroyan sa Sanciangko’s Wildflower.”

Sa unang gabii sa pag-abut ni Tiyo Berto dinhi sa dakbayan, gisuroy dayon siya ni Max. Giangkas ni Max sa motor ang iyang uyoan.

Misirit sila sa Sanciangko ug mihunong sila tungod sa Sanciangko’s Wildflower. Giparking ni Max ang iyang motor sa daplin sa karsada. (Sumpayan)