Gula 2
Sanglit atua na siya magbase sa Kaulohan, panagsa na lang siya makaduaw sa Sugbo. Hectic kaayo ang iyang schedule ilabi na nga may teleserye siyang giapilan nga mag-taping gayod siya alang niini unom ka adlaw matag semana. May mga singing engagements pa usab siya sa lainlaing dapit sa Kaulohan. Sa kaprobinsiyahan ug sa ubang dapit gawas sa Pilipinas.
Mao nga kun makapauli si Jackie sa Sugbo, kuninitan gayod siya sa iyang mga fans. Ug dili magpaulahi ang mga sakop sa media nga mahiligon kaayo sa iyang career, importante kaayo ang publisidad mao nga gipaningkamotan niya nga makamugna og maayong bonding tali sa mga sakop sa media.
“How does it feel karon nga naka-establish ka na gayod og ngalan sa showbiz?” Pangutana ni Bonding Adrian, ang anchorman sa tulomanon nga Showbiz Patrol sa DYAB.
“Nindot kaayo ang akong feeling,” tubag ni Jackie. “Nagpasalamat ko’g dako sa akong mga fans, ilabi na sa mga Cebuanos nga misuporta nako.”
“Since tua ka na magbase sa Kaulohan,” nagkanayon si Sanden J. Anadia, showbiz writer sa Banat News, “I understand nga lisod na gayod alang kanimo ang pagngadto-nganhi sa Cebu ug Manila. Gimingaw ka ba sa Cebu ug mga Sugbuanon?”
“Of course,” matud ni Jackie. “Dinhi ko natawo sa Cebu, so dili gyud nako makalimtan kining dapita. Gawas pa, nia dinhi ang akong mga ginikanan. Kun mahimo pa lang duawon ko sila kada adlaw. Ugaling lang kay dili puwede tungod sa ka-hectic sa akong sked.” -- Sumpayan pa