Kamatayon sa Panumpa

Gula 84

Usa ka higayon niana, nag-shopping si Xenia sa SM. Wala niya damhang magkakita sila si Kendall, ang kanhi niyang boyfriend. Nahiuli na diay kini sa Pilipinas gikan sa United Arab Emirates.

Salamat nga nagkita ta, Xenia,” ni Kendall nga ingon sa nahinangop pag-ayo. “Dugay na kong nangita nimo. Didto ko’s inyong gipuy-an kaniadto sa Quiot apan wa ka na man diay didto.”

“Nganong nangita ka man nako?” May kauga ang sinultihan ni Xenia.

“Nasayod kong nahiubos ka kanako, Xen. Pero ning akong pagbalik, gusto kong ipadayon na nato ang atong gugma.”

“Human mo patya ang atong mga panumpa, moingon ka na karon nga ipadayon nato ang atong gugma?”

“Please, Xenia, hatagi ko’g laing higayon...”

“Kun wa ka makadawat nako kaniadto tungod sa imong pagduda nga may lalaki nga nakauna sa akong pagka babaye, labaw na tingali karon nga hugaw na gyud kong pagka babaye?”

Ug gitug-anan ni Xenia si Kendall nga daghan nang mga lalaki ang miagi sa iyang kinabuhi.

“Di ko igsapayan ang imong kagahapon, Xenia,” ni Kendall pa. “Basta hatagan mo lang ako’g laing higayon.”

“Di ba kutob ra man sa hymen ang imong gugma?” Sikmat ni Xenia.

“Nakaamgo na ko, Xenia, nga dakong sayop ang akong pagtuo bahin kanimo kaniadto. May usa ka sex expert nga nakatug-an nako nga duna gyud diay mga babaye nga dili mag-bleeding sa unang higayon nga sila nakighilawas og lalaki tungod sa nagkadaiyang mga hinungdan.”

Wala dayon motuo si Xenia sa gipanulti ni Kendall. Iya unang gisuta kun matinud-anon ba si Kendall sa tuyo niining pagpakig-uli kaniya.

Paglabay sa pipila ka adlaw, nasuta ni Xenia ang kamatinud-anon ni Kendall. Ug kay may luna pa man gihapon ang ulitawo sa iyang kasingkasing, nadugtong pagbalik ang ilang relasyon. Ug gibanhaw nila ang ilang mga panumpa. -- Kataposan