Bawion ko ang imong gugma

Gula 44

“Salamat,” ni Annie dayong dawat sa sulat.

Nahilom sila. Gibuksan dayon ni Annie ang sobre ug gikuha ang papel nga unod niini. Usa diay ka invitation card ang gipadala ni Lea alang kaniya. Gidapit siya sa iyang higala pagtambong sa pagsaulog sa adlaw’ng natawhan niini.

“Ingna palihog si Lea nga dili segurado kun makatambong ko sa iyang birthday,” nagkanayon si Annie human mabasa ang sulat.

“Ngano man? ni Melvin pa. “Nag-ingon ra ba si Agaw Lea nga usa ka sa labing importanteng bisita nga iyang paaboton.”

“Basta, dili ko segurado nga makatambong.”

“Tungod ba nako?” Gitutokan siya ni Melvin.

“Di na kinahanglang masayod ka sa hinungdan,” ni Annie nga milingiw sa tinan-awan ni Melvin kaniya.

“Kun ako man ugaling ang hinungdan, An, mahimong dili ko motambong sa birthday party ni Agaw Lea ugmang adlawa. Ayaw lang pakyasa ang iyang pagdapit nimo.”

“Dili kana maoy hinungdan, Melvin. Kuan...may importante lang kong lakton ugma. Kauban nako si Edelmar.”

“D-diay ba?” Mora’g nahisagmuyo si Melvin sa iyang gisulti.

Wala na mamugos si Melvin kaniya. Wala madugay, nanamilit na kini.

Pagkasunod gabii, nakugang si Annie sa kalit nga paghibutho ni Edelmar sa ilang pinuy-anan sa Pit-os. Pasado na alas diyes ang takna sa kagabhion sa paghiabot ni Edelmar sa ilang balay. Dili kini ginhapon. Kasagaran kun mamisita si Edelmar kaniya, mahiabot kini sa ilang gipuy-an sa alas sayis ngadto sa alas otso sa kagabhion. Karon lang nahitabo nga nagabhian si Edelmar. -- Sumpayan pa