Bawion ko ang imong gugma - Gula 43

Midali siya pag-adto sa sala. Pero nakugang siya pagkakita sa giingong bisita niya. Si Melvin! Ania na usab si Melvin!

Nganong nia na man sab ning tawhana? Nakasukot si Annie sa hilom sa iyang kaugalingon kinsa mibati na’g kalagot ngadto kang Melvin nga wala gayod molunga sa tuyo niini kaniya.

Kay diha na man gayod si Melvin sa ilang pinuy-anan, iya na lang kining gipakigsultihan. Iyang girespetaran. Basin unya’g makaingon kini nga bastos siyang pagka-babaye kun dili siya makig-atubang niini.

“Wa ba ko makasamok?” Gikan ni Melvin.

“Wa man,” mubo niyang tubag.

Pero didto sa iyang hunahuna, kanindot na gyung prangkahan ni Melvin nga nakasamok kini kaniya ug dili na siya gustong makakita niini. Apan nagpugong lang siya. Dili siya gustong mahulog sa walay batasan kun magpakita siya’g salawayong kinaiya.

“Kumosta ang pagpanuroy ninyo ni Edelmar?” pangutana sa ulitawo.

Wala makatingog si Annie. Nakugang siya kun nganong nasayod kini nga nanuroy sila si Edelmar.

“Nakakita ko ninyo kaganina,” ni Melvin pa. “Nangaon mo sa Jollibee. Naibog kong nagtan-aw ninyo. Wa na lang ko moduol aron dili ko kamo madisturbo.”

“Salamat nga mao kanay imong gibuhat.”

“Sa gikaingon ko na, An, di ko magsamok sa inyong relasyon. Ayaw lang ko hikawi sa pagpadayon sa paghalad sa akong gugma diha nimo.”

Wala na usab motingog si Annie.

“Niay gipahatag ni Agaw Lea,” ni Melvin dungan sa pagtunol sa usa ka sobre ngadto kang Lea. “Alang kuno kini kanimo.” -- Sumpayan pa