Baboy na 'na 'Dre

Usa ka Domingo, nakita ni Padre Amboy ang tawo nga niwang samtang nakighimamat siya sa mga parokyano nga nanimba sa dakung kapilya sa Tangke. Lago kaayo ang tawo nga binukhad ang palad ngadto sa nanimba nga mangagi sa pultahan human sa misa. Nagpakilimos intawon...!

Gani, ingon sa wa matunhay ang lamano sa batan-ogn Pari ngadto sa nanimba kay ang panan-aw gipunting man sab sa nagpakilimos. Natandog pag-ayo ang balatian sa Pari. Naanad man gud si Padre Amboy sa panabang sa didto pa siya sa America sa iyang krusada: “BRING THE CHURCH TO THE HEARTS OF THE PEOPLE...!”

Mao bitaw nga napilian siya’ng madestino sa bag-ong gisubhan nga kapilya sa Tangke gumikan sa hiyas nga manggiluy-on nga pari bisan pa man sa iyang kabatan-on...!

Paglabay ni Crispin nga sakristan gikan sa kapilya nga nagbitbit sa galamtion sa Pari: “Crispin, kadiyut lang...!” Sangpit sa Pari.

“Dad-a sa kombento kanang makililimos. Ligoa ug pakan-a. Tagai sa maayong bisti basin pa’g suway kini sa Ginoo..!” Midason ang Pari. Lagi kay buotan nga sakristan, way ungol si Crispin. Giduol niya ang makililimos nga nagyaka sa pultahan ug giagak paingon sa kombento nga nahimutang luyo sa kapilya. Siya ang gitahasan pag-atiman sa makililimos ug gituman ang sugo sa Pari.

Pila ka semana ang milabay, nangumusta ang batan-ong Pari kang Crispin labot sa giatiman nga makililimos.

“Kumusta na ang tawo...” naulian na ba ang panglawas...?”

“Molang...! Tua sa kombento nagkaon nga naghigda. Buwisit...!” Nagpaminti si Crispin nga namulong.

“Tan-awa ‘nya human sa misa, “Dre...!’’

Midalikyat ang Pari sa kombento human sa buntagong misa ug tuod man iyang nakita ang makililimos nga nagkisapkisap ang baba samtang naghigda. Tambok na ug hapsay pa ang hinapay...!

Dali nga mibiya sa kombento ang Pari ug gikahinagbo si Crispin nagbitbit sa galamiton sa Pari panahon sa misa.

“Unsa na, ‘Dre...!” Mayubitong sukna ni Crispin ngadto sa Pari.”Di na tawo..., baboy na kana. ‘Dre...., hehehehe....!’ Ang Pari nga nakadungog sa yubit ni Crispin, igo lang nanguros ug nagkanayon hilum: “Diyos ko..., tinuod ba   ang giingon ni Crispin...?” (Katapusan)