Nakapangutana kun unsay gilamas

Upat pa lang gani ka buwan, sukad nabiyudo si Miyoy kang anhing Nisya, agig kailiw sa kamingaw sa naanhing niyang asawa, nagtukod na siya og karenderya, sa may kilid sa karaan niyang balay, ning ilang balangay sa Tinubdan.

Gumikan sa kamaayo niyang motimpla, diin hitsason gyod niya og lamas ang iyang tinuwa sa isdang timbengan, dili kini kaudtohan.

Ilogan sa mga suki niyang pumapalit, ilabi na nga mangalisngaw pa sa kainit ang sabaw sa iyang tinuwa nga iyang gilak-ang sa may himabaw sa dakong kaldero.

"Basin imong gitiktihikan og butang og lamas Miyoy kay hilabihan mang langsiha nga higopon ang sabaw sa imong giluto nga tinuwa?" kadilion og higop sa sabaw si Digna, ang dalagang guwang nga ingon sa wa ganahi.

"Tanang klase sa lamas ang akong gisagol Digna!" mubong tubag ni Miyoy nga nahisagmuyo sa gipamulong ni Digna.

"Pruyba niini ... dili gani kaudtohan ang akong linuto nga tinuwa!"

Ligid sa mga adlaw'ng nanglabay. Nagpadayon si Miyoy, sa pagluto og tinuwa. Mangadlawon god siya og adto sa Pasil aron makakompra og isdang tuwaunon, sama sa dagkong mamsa, rompi kandado ug halwan tasik. Mamituon man god ang sabaw, ilabi na kun kompletuhon niya sa lamas.

Kilumkilom kadto. Way hunong ang pagbunok sa ulan diin naghigdaay lang si Miyoy sa iyang dakong lantay.

Ambot unsang pagkahitabo ... mikalit man lang og pagbutho si Digna nga seksi kaayong nagsul-ob sa iyang maong nga short pants. "Yoy ... kasayo god nimong natulog?" giyugyog ang iyang abaga ni Digna.

Gialimungawan og kalit si Miyoy. Nanginit ang iyang kalawasan, bisan pa sa katugnaw sa panahon.

"Anaa pay nahabilin nimong linuto nga tinuwa Yoy?" ni Digna pa nga sobra ka paraygon ang panuni sa tingog.

Ambot unsang pagka unsaaa ... nga gigakos man ni Miyoy ang kahubag sa hawak ni Digna? Giukoban sa nagpungasi nga halok.

Miaringkil ang mga kaldero ni Miyoy nga nahimabaw pa sa tinuwa ug nangayabo. Mao na lamang ang nabati ang sagunson nga pangutana ni Digna nga nagkanayon:

"Unsaaaa .... mayyyy .... imonggggg .... gilamassss ... Yoyyy .... saaaa .... imongggg ... tinuwaaa ... ngaaaa .... hilabihan mang ... lamiaaaa?" (Katapusan)