Sayop nga pagtuo

Natingala nalang si Harold dihang nasugatan niya ang iyang asawa nga si Melanie nga gikang migawas sa ilang kuwarto nga nagmug-ot lang. Wala gani kini motagad kaniya sa dihang iya kining gitimbaya.

Kay nasayod man kaayo siya sa kinaiya sa iyang asawa, wala nalang kini niya sukitsukita. Gipasagdan nalang niya kini nga nanaog sa ilang balay. Ug mipaingon ilang      tindahan.

Dala ang tualya misulod dayon si Harold sa ilang banyo aron maligo. Human niyag kaligo mibalik siya’g sulod sa ilang kuwarto ug nag-ilis. Giilisan niya ang iyang t-shirt ug short pants kay bulingon naman kini. Apan short pants lang gihapon ang iyang gisul-ob ug giparesan gihapon niya kini’g t-shirt. Kanang t-shirt nga walay manggas.

Human niya og ilis, migawas dayon siya sa ilang kuwarto ug gitawag ang iyang asawa nga morag dunay gikurikuri sa ilang tindahan. Kita man god kaayo niya kini gikan sa iyang nahimutangan.

"Unsa man, dili pa ta mamahaw?" Gisukot ni Harold ang iyang asawa. Wala pa man god siya makakita og mga sinukad diha sa ilang talad-kan-anan. Labon unta, panahon na man nga tingkaon. Kay milapas naman ang ika-alas siyete sa buntag.

"Uy, kaon lang dihag imo, kun gigusla ka na," gisinghagan lang hinuon si Harold sa iyang asawa. Ug igo lang intawon siyang nakapangawot sa iyang ulo. Naglibog man god siya kun unsa gayod ang nasuk-an sa iyang asawa. Nganong naingon ang taras niini? Niini pa gyod nga buntag sayo.

Gihunahuna pag-ayo ni Harold kun unsa gyod ang nasuk-an ni Melanie. Wala man unta sila mag-away. O maglalis ba hinuon. Gani, wala man sila magkasultihanay nianang milabay nga gabii. Kay una man siyang nahikatulog kay sa iyang asawa. Kay mitan-aw pa man si Melanie sa salida sa telebisyon. Nagsunod man god kini sa teleserye nga nag-ulohan og "Agua Bendita".

Ug niana sab nga buntag sayo una man nga mibangon ang iyang asawa kay kaniya. Tagsayo man god momata ang asawa ni Harold. Samtang siya naanad naman nga tag-udto na nga momata. Bisan tuod og tigsayo siyang matulog.

"Unsa bay nakaon nimo, nga mikalit man lang ka og lami?" Nakapangutana nalang gyod si Harold ngadto sa iyang asawa.

"Suma! Hunahunaa kuno pag-ayo kun unsay binuang nga nahimo nimo?" Misumbalik sa pagpangutana si Melanie ngadto kang Harold.

"Unsa bitaw ang akong nabuhat nga nakapasuko kanimo?" Giusab pagsukot ni Harold ang iyang asawa. Naglibog man god siya kun unsay nahimo niyang sala.

"Kini diay? Molimod ka nga imo kining suwat, alang ngadto sa usa ka babaye?" Matud pa ni Melanie dungan ang pagpakita sa usa ka sobre nga may nakasulat nga ngalan sa babaye sa ibabaw niini.

"Uy, kana diay?" ni Harold pa nga morag nahimuot. Ug mangatarungan na unta siya ngadto sa iyang asawa. Apan mikalit kinig talikod kaniya. Hangtod nga nagkasugat kini ug ang iyang pag-umangkon nga si Ode.

"Unsa man Tiyo nabuhat na nimo ang akong gipahimo kanimo?" Ni Ode pa ngadto kang Harold. "Hain naman?" Gisukot na usab si Harold sa iyang sa pag-umangkon nga ulitawo.

"Naa ay, kang Tiya Melanie nimo," ni Harold pa usab.

Kalit lang nga nahapaurong si Melanie pagkabati sa gisulti ni Harold ngadto kang Ode nga iyang pag-umangkon. Diha pa siya mahibawo kun si kinsa diay ang tag-iya niadtong suwat nga iyang gikuptan. Mora hinuon siya’g gibatig kauwaw ngadto sa iyang bana niadtong tungora. Kay nasayop man diay siya sa iyang pagtuo. (Kataposan)