Makapahupay ang pagpasaylo

Duna na moy suspek kun kinsay nagpusil ni Wilben?" sukot ni Teddylyn ngadtong Marivel. Nag-atubang   sila’g lingkod sa terasa sa balay ni Marivel sa baryo Udlot. Human na sila’g paniudto ug nagpahangin sa terasa. Ang bana ni Marivel nga si Ritche ig-agaw ni Teddylyn.

Si Wilben kamaguwangang anak ni Marivel.Ang ikaduha ug kamanghuran, si Ferdinand, kasamtangang nag-abi-abi sa iyang mga barkada. Ulitawo pa si Wilben. Negosyante’g kopras. Unya usa ka higayon nga nagdiliber siya’g kopras sa dakbayan, gipusil samtang namahaw. Wa katiwas og kaon ang alaot. Niubo sa lamesa nga wa nay kinabuhi. Usa ka tuig na ang nakalabay gikan sa hitabo. Duha ka adlaw sa wa pay pista sa Udlot. Wa sila kasaulog sa pista sa niaging tuig. Karon, nakasaulog sila dala ang paghubkas sa kamatayon ni Wilben. Ug bisita ni Marivel si Teddylyn ug iyang kapikas nga si Edward.

Nagkalingaw og inom si Edward ug si Ritche samtang nag-atubang sa video sa sala sa balay sa naulahi. Si Edward manedyer sa Royal Charms Pharmacy. Si Teddylyn magtutudlo sa saring publiko. Si Ritche drayber og taksi. Si Marivel klerk sa opisina sa Tasador sa dakbayan.

"Wa lagi" ni Marivel nga nasubo ang nawong. Nipula ang mga mata. "Paita no! Wa gyud diay nakakita sa hitabo?" ni Teddylyn, subo sab ang hitsura. "Gipaundang ko nalang ang imbistigasyon. Kay dako na lang ko’g gasto. Unya bisag madakpan pa ang nagpusil, di naman mabalik ang kinabuhi ni Wilben," ni Marivel. "Unsa man diay imong nagastohan? Nagsuhol diay kag mga sekreta?" ni Teddylyn. "Wala. Pero, may bayad man diay ang cartographic sketch. Ug kada adlaw mangayog panggasolina ang otoridad. Primero ana, sa bag-o pa ang hitabo, wa kunoy bayad ang cartographic. Apan paghimanhiman, pabayran man diay? Nisurender nalang ko. Hasta sab si Ritche. Kay sa among tan-aw malangit man to si Wilbert. Kay puwerte mang but-ana bataa. Aktibo kaayo sa tanang kalihokan sa simbahan," ni Marivel. Nipahiyom og gamay.

"Buanga bitaw, Vel. Nagkita pa man mi ni Wilben sa Green Meadow Emporium usa ka semana sa wa pa ang hitabo. Sila’s Edward maoy unang nagkita. Kay hilig man si Edward og bargain nga libro, nanan-aw siya’g libro sa third floor. Ako niadto ko sa grocery section. Pagkanaug ni Edward nakit-an niya’s Wilben nga naglingkod sa may kan-anan. Dugay siyang nakaila ni Wilben kay nanambok. Si Wilben dugay sang nakaila ni Edward kay nidaut ug nagpamobo og buhok. Mora na’g si Derek Ramsay ang tupi. Dugay silang nagkatinutokay. Unya dihang niduol si Wilben ug niamin niya, diha na niya nasuta nga si Wilben diay," ni Teddy.

"Maayo kay nagkakita pa gyud mo!" ni Marivel. "Pagdungog lagi ni Edward sa hitabo, nakaingon siya nga wa lang damha nga katapusan na diay to namong panagkita ni Wilben," ni Teddylyn. "Di lang gyud maseguro ang kinabuhi sa tawo. Kun mabugto sa sakit, makaingon ta pagbuot sa Diyos. Kun gipatay, makaingon ta pagbuot sa tawo," ni Marivel. "Wa gyuy lead ang mga otoridad kun unsay motibo sa pagpatay?" ni Teddylyn. "Moingon lagi sila nga kompetensiya kuno sa negosyo. Apan wa man gyu’y ebidensiya," ni Marivel nga nanghupaw. Nisuyop siya sa straw sa soft drink. Nisuyop sab si Teddylyn. "Unsa man lay pulong ni Ritche?" ni Teddylyn. "Lay minister man sab si Ritche. Gihangad nalang niya sa Ginoo ang tanan. Niya pa, kahadloki ang makapatay sa kalag ug lawas. Dili kay sa lawas lang. Kun gipatay ang lawas ni Wilben, buhi man iyang kalag. Gipasaylo na niya ang nipatay ni Wilben. Mao nalang say akong hukom. Kay kun di ta kapasaylo, kanunay man lang tang magbangutan" ni Marivel. Nipahiyom.

Natandog si Teddylyn. Nanghupaw. Nipula ang mga mata. Gigunitan ni Teddylyn ang kamot ni Marivel. "Nalipay ko nga nakadawat na ka sa hitabo. Mogaan na imong dughan" ni Teddylyn. "Diyos na lay mag-igo sa nipatay ug nipapatay sa akong anak. Gawas pa, gipadamgo man ko nga malipayon ug malinawon na siya. Busa, nagmalinawon na lang sab ko," ni Marivel. "Managkot hinoon ta sa Mahal nga Birhen. Mao man sab nay among giari sa Udlot" ni Teddylyn. Nagpahiyom. "Sige" ni Marivel. Ug nanindog sila aron agnihon ilang mga bana.

Bisi pa ang panimalay ni Marivel sa daghang bisita sa pista. May mga katabang sila. Apan sila gyung managtiayon ang nangunay sa pag-abi-abi ni Teddylyn ug ni Edward. (Kataposan) (Sa gusto’g libreng konsulta, dad-a ning pahina sa opisina sa tagsulat. Sa Sabado sa buntag)