Bawion ko ang imong gugma

Gula 34

Usa ka adlaw sa dili pa mokuha og pasulit si Edelmar, nagkuyog sila si Annie sa pagpanimba sa Sto. Niño Church. Gipangaliya ni Annie sa hilom nga unta makapasar na si Edelmar sa sunod niining pagkuha og teacher’s board. Dili siya buot nga mapakyas ang pangandoy sa iyang hinigugma. Giisip niyang kadaogan ang bisan unsang kalamposan nga maangkon ni Edelmar.

Sa pagpanggawas nila sa simbahan, misugyot si Edelmar nga mangaon una sila. Misulod sila sa outlet sa Chowking nga diha ra sab duol sa simbahan. Nangaon sila.

Igo lang silang nahuman pagpangaon, nasigpatan ni Annie si Lea nga maoy pagsulod sa Chowking. May kauban kining lalaki ug mora’g nakaila siya niini. Si Melvin! Dili mahitabong masayop siya. Si Melvin ang lalaking kuyog ni Lea. Bisan tuod og mitambok og diyotay si Melvin apan nakaila gihapon siya niini.

Ania na diay usab si Melvin sa Sugbo, nakaingon si Annie sa hilom. Dugay-dugay na siyang wala makabalita mahitungod sa ulitawo. Sukad niadtong pagpanawag niini kaniya sa cellphone, wala na siya’y kasayoran mahitungod kang Melvin. Dili man sab siya interesadong masayod sa bisan unsang mahitungod kang Melvin. Sa higayon gani nga maghisgot si Lea mahitungod kang Melvin, iya man dayong barawon ang iyang higala.

Ang nahimutangan nilang Annie ug Edelmar nadapit sa suok nga bahin sa kan-anan hinungdan nga wala sila makita nila ni Lea ug Melvin. Ang duha didto modiretso sa orderanan og pagkaon.

Giagni ni Annie si Edelmar nga manggawas na sila sa Chowking. Dili siya buot nga makakita sila si Lea ug Melvin kanila. Tuod, nanggawas sila sa kan-anan.