Gula 2
Samtang nagdagan ang barko paingon sa Manila, didto sila si Jessie ug Nympha magkalingaw og sultihanay sa bridge sa barko.
Wala nila mamatikdi ang paglabay sa oras hangtud nga off-duty na si Jessie. Nagkuyog sila balik sa kabin. Gipadayon nila ang pagsuginlanay sa ilang mga kaagi.
“May hinigugma ka na ba Nym?” ni Jessie pa nga daw buot masayod sa pagkatawo sa iyang bag-ong higala. “Nagbuwag na mi Jess kay abubhoan kaayo,” pasabot ni Nympha kang Jess nga igo lang miyango.
“Ikaw, ulitawo ka pa ba g’yud? Lisud na man katuohan karon nga ang sama nimo nagpabilin pa nga walay kapikas,” nagpahiyom si Nympha nga mitutok ni Jessie. Wala motingog si Jessie.
Mga alas singko sa hapon, nagdungan sila pagpangaon. Gihatdan ra sila’g pagkaon sa kabin sanglit opisyal man sa barko si Jessie. Giapilan si Nympha og pagkaon kay gipahibalo na man daan ni Jessie ang kusinero nga duna siya’y bisita.
“Human nato’g panihapon, dunay videokehan didto sa canteen, adto na unya Nym kay magkalingaw kita’g kanta-kanta,” giingnan ni Jessie si Nympha. Human nila’g kaon, nananghid si Nympha nga maligo.
“Sige, biyaan ta usa ka dinhi. Kaligo na lang diha sa banyo Nym kay adto usa ko sa kabin sa second mate,” matud ni Jessie dayong gawas sa kabin.
Mga tunga sa oras, nahuman na’g kaligo si Nympha ug nakailis na gani. Gitan-aw niya ang iyang kaugalingon sa samin, bisan mismo si Nympha dili makalimod sa iyang kaanyag.
Dayon may nanuktok sa pultahan sa kabin ug gibuksan ni Nympha. “Human kana’g kaligo? Tana, gipaandam na nako ang videoke sa canteen. May kanta ko nga ipahinungod kanimo Nym,” matud ni Jessie.
Mikidlap lang ang mga mata ni Jessie nga mipasiklap sa kaanyag ni Nympha. Angayan kini kaayo sa iyang gisul-ob.
May nanganta na sa mga pasahero didto sa canteen pag-abot nila ni Jessie ug Nympha. Didto usab ang ubang mga opisyal sa barko nga mitutok kanilang duha.
“Swerteha gud nimo Jess nga nakapalag ka man dayon og partner,” matud sa second mate nga si Nestor. “Sige na Jess, daliti na’g kanta ang imong kauban.”
Gi-encode dayon ni Jessie ang una niyang selection. Awit ni Martin Nievera, ang Be My Lady.” Mihugyaw ang pakpak sa mga kauban ni Jessie apil na sa ubang pasahero. (Sumpayan)