Marinero

Talilarga na paingon sa Manila ang barko nga gitrabahoan ni Jessie. Third mate siya sa maong barko ug iyang trabaho ang pag-asikaso aron pagsiguro nga luwas ang ilang biyahe.

Wala nay nanakay nga mga pasahero ug si Jessie didto na sa pantalan aron pagkuha sa draft sa barko. Samtang gitan-aw niya ang sukod didto sa pupa kon luyo nga bahin sa barko nahaigking siya.

“Good morning,” tingog sa usa ka babaye ang nadungog ni Jessie gikan sa iyang luyo. Nakita ni Jessie ang usa ka babaye nga nagpahiyom kaniya. “Sir pwede ra ko nga mosakay? Wala pa lagi ko kalukat og tiket,” sa babaye pa.

Nagpaila ang babaye nga siya si Nympha. Dinalian ang pag-adto niya sa Manila ug kinahanglan g’yud nga mahiabut na siya ugma. Gianognan sa higayon si Jessie mao nga nangita siya’g paagi.

“Angkonon ko lang ikaw nga akong ig-agaw para makasakay ka sa barko bisan og walay tiket. Adto lang ibutang ang imong mga dala sa akong kabin,” tanyag ni Jessie kang Nympha.

Mapasalamaton kaayo si Nympha sa tabang ni Jessie. Nakalarga g’yud si Nympha paingon sa Manila.

“Opisyal ka diay niining barko Jess?” pangutana ni Nympha. Igo lang mikatawa si Jessie. Maila nga opisyal si Jessie tungod sa uniporme nga iyang gisul-ob.  

Kay duty pa man ni Jessie niadtong higayuna, gibilin ra niya si Nympha sa kabin. “Dinhi ka lang pahuway Nym, karon pang alas dos sa hapon ang akong off. Adto usa ko sa bridge,” ni Jessie pa nga ang gipasabot mao ang dapit nga tua ang timonel sa barko.

“Kahayahay gud nimo Bay Jess, may bawon ka man nga chicks sa imong kabin,” matud sa timonel nga si Rey nga klaro kaayong naibug sa sitwasyon sa iyang opisyal. Mipahiyom ra si Jessie. Samtang naglawig ang barko, nagkukalingaw ra’g basa-basa si Jessie. Apan kalit lang daw nagsalimoang ang duha ka timonel nga diha sa iyang tupad.

“Hala, naay gwapa kaayong babaye nga misuroy dinhi sa bridge sa barko. Kagwapa g’yud uy,” matud ni Rey. Napalingi si Jessie ug si Nympha maoy iyang nakita nga nagtampo sa dagat.

Giduol ni Jessie si Nympha. “Uy, misuroy ka diay Nym? Gibiyaan nimo ang kabin?” matud ni Jessie nga miagbay sa babaye. “Gi-lock ra nako Jess dia man ang yawe.”

“Hayahay man diay dinhi sa bridge sa barko,” ni Nympha pa nga misamot kaanyag samtang gipalid-palid sa hangin ang iyang buhok. (Sumpayan)