Wala tug-ani ni Annie si Lea sa bag-o niyang numero. Nasayod siya nga kun masayod kini sa bag-o niyang numero, bisan pag-iya kining baoran apan motug-an gayod kini ngadto ni Melvin nga nag-ilis siya’g numero sa cellphone. Nasayod siya nga suod kaayo nga manag-agaw sila si Lea ug Melvin.
Si Edelmar lang ang bugtong nasayod sa bag-ong numero ni Annie. Wala siya’y laing gitug-anan sa iyang numero gawas kang Edelmar tungod kay kini lang ang labing importanteng linalang sa iyang kinabuhi.
Nagpadayon ang walay bugto nga komunikasyon nila ni Annie ug Edelmar pinaagi sa text. May mga higayon nga manawag si Edelmar kaniya tungod kay gusto kining makadungog sa iyang tingog. Sa matag higayon nga magkasulti sila si Edelmar sa cellphone, nabatyagan ni Annie nga daw bayawon siya ngadto sa langit kun makadungog sa tingog sa namingawan niyang hinigugma.
Wala na gayod magsamok si Melvin kaniya pinaagi sa text. Si Lea nagpunay og samok kaniya sa pagpangayo sa bag-o niyang cellphone number apan wala gayod siya mohatag ngadto niini. Dili siya buot nga makaabot ngadto kang Melvin ang iyang numero pinaagi kang Lea. Maong wala gayod niya hatagi si Lea sa iyang numero bisan giunsa niini’g pamugos.
Daw mikilab lang ang upat ka tuig. Nakadawat si Annie og pahibalo gikan kang Edelmar nga mogradwar na kini sa kursong edukasyon nga gikuha niini. Nahinangop pag-ayo si Annie. Nalipay siya nga nagmalampuson gayod ang iyang hinigugma sa gitinguha niini nga makatapos og kurso sa kolehiyo. -- Sumpayan pa