“Giunsa nimo pagkasayod sa akong numero? “Pakisayod sa dalaga.
“Gitug-anan ko ni Agaw Lea.”
Karon naklaro na ni Annie ang tanan. Si Lea diay ang nagtaho ngadto ni Melvin nga may cellphone na siya mao nga nasayod kini sa iyang numero.
“Kumosta na man tong akong giingon nimo, An?” Sukna ni Melvin pagkilab sa pipila ka daklit.
“A-ang hain ba niadto?” Nagpakaaron-ingnon si Annie nga wala makasabot sa gisulti sa ulitawo.
“Kadtong gugma nga akong gihalad nimo?”
“Hangtod ba karon magpadayon ka lang gihapon paghisgot niana? Ang gitubag kanimo kaniadto mao ra usab gihapon ang akong itubag kanimo karon.”
“Pero, An...”
“Melvin, please. Ayaw na ko’g samoka. May hinigugma na ko. Kun tinuod kang nahigugma nako pasagdi kong magmalipayon uban sa lalaki nga akong gimahal.”
Ug gitapos na ni Annie ang ilang panagsulti ni Melvin. Dili siya gusto nga makigtubay og dugay sa ulitawo. Dili siya gustong mahasol ang iyang hunahuna tungod kang Melvin.
Giilisan ni Annie ang iyang SIM pack. Gituyo niya kini aron dili na makakontak si Melvin kaniya. Nasayod siya nga kun dili niya ilisan ang iyang numero, dili siya lung-an pagsamok ni Melvin pinaagi sa pagpanawag og pag-text niini kaniya. -- Sumpayan pa