Bawion ko ang imong gugma - Gula 28

Mitingog pag-usab ang iyang cellphone. Iyang gisusi. Gikan na usab sa misteryoso niyang texter. Nagtuo siya nga mao ra gihapon ang unod sa mensahe nga gipadala niini mao nga dili na lang unta niya kini basahon ug ideretso na lang pag-delete. Apan nausab ang iyang huna-huna ug iya na lang gyu’d gibasa.

Ang text message nag-ingon: “kumzta ka? c Melvin ni.”

Nakugang si Annie. Wala siya magdahom nga si Melvin diay ang nagpunay og text kaniya og I LUV U. Ang iyang gikahibudngan kun nganong nasayod man si Melvin sa iyang cellphone number. Giunsa man niini pagkasayod nga may cellphone na siya ug sa numero niini?

Gi-delete dayon niya ang text message ni Melvin. Wala niya i-phone book ang numero sa cellphone sa ulitawo. Wala siya’y interes sa pagrehistro sa numero niini sa phonebook sa iyang cellphone.

Wala madugay, mitingog ang incoming call alert sa iyang cellphone. Bisan wala ma-phonebook ang numero nga nanawag apan nakaseguro siya nga kang Melvin kini. Nakasukot siya sa iyang kaugalingon kun tubagon ba niya o dili ang tawag ni Melvin.

Nagpadayon pagbagting ang iyang cellphone. Gitubag na lang gyud niya ang tawag ni Melvin aron masayran niya ang tuyo niini.

“Kumosta ka na,” ni Melvin didto sa pikas linya.

“M-maayo man,” mubong tubag ni Annie.

“Guwapa gihapon, diba?”

Wala motubag si Annie.

“Nalipay ko pagkasayod nga may cellphone ka na,” ni Melvin pa, “aron makakontak ko nimo kanunay.” -- Sumpayan pa