“Tungod kay dili sila gustong mobiya ko sa pundok.”
“M-mao ba?” “Sa dihang gikahimamat ko ikaw sa club, nakahukom kong himuon kang inspirasyon sa akong pagbag-o sa akong kinabuhi. Nananghid ko sa akong mga kauban sa grupo nga mobuwag na ko nila. Apan nasuko sila. Nabalaka sila nga mahimo ko nilang problema sa umaabot nga panahon maong nakahukom sila paglikidar nako. Maayo gani kay nakahigayon ko pag-ikyas niadtong gabii nga ila na unta kong i-salvage.”
“M-my God...” “Dili gyud ko nila lung-an hangtod nga ila kong mapatay, Xenia. Labina karon nga may duha na kanila nga akong napatay.”
“Wa ko magdahom, Reno, nga usa ka diay ka tulisan.”
“Pasayloa ko, Xenia, nga wala ko ikaw tug-ani dayon niini. Dili ko gustong molikay ka kanako sa higayon nga masayod ka sa matuod kong pagkatawo mao nga nangita ko’g tukmang panahon pagsulti nimo sa kamatuoran.”
Wala na motubay si Xenia sa gisulti ni Reno. Kalit niyang gipunit ang armas niini nga gipatong sa ibabaw sa lamesita. Hugot kini niyang gigunitan. Gitumong niya ang sumbohan sa pistola ngadto ni Reno. -- Sumpayan pa