Drayber Sweet Lover

Gula 5

 Wala kawanga ni Elmer ang hangyo ni Marie kaniya nga ihatud siya sa ilang balay sa barangay Malingin, dakbayan sa Bogo.

Wala na mouban si Dadoy kang Elmer. Ngitngit pa sa pag-abut nila ni Elmer ug Marie didto sa panimalay sa dalaga. “Lakaw na, dili lang usa ko manuktok kay kasab-an unya ko ni lola. Kami ra ang nagpuyo dinhi sa among payag,” matud ni Marie.

Diha ra sila sa PUJ nga giparada unahan nga bahin sa balay. “Gihagkan pag-usab ni Elmer si Marie. Wala gayud motukol si Marie sa gihimo kaniya sa drayber.

“Karon nga naangkon na ko nimo, sigurado ko nga imo na lang kong binuangan. Sagdi lang, naanad na ko nga ingon niini ang akong kapalaran,” ni Marie pa nga bugnaw kaayo’g sinultihan.

Daw natandog si Elmer sa gisulti sa dalaga. Iya kining gigakus og hugot, gihagkan. “Ayaw kabalaka Mar, gikan karon ikaw na ang akong higugmaon. Magtipon ta, himoon ko ikaw nga kapikas sa akong kinabuhi,” matud ni Elmer.

Daw nakalitan si Marie kay wala siya magtoo nga tinud-on ni Elmer ang iyang gisulti. Apan misamot siya og kasuod ni Elmer.

Nag-ukobay na usab ang ilang masig ka mga ngabil. “Elmer, lauman nako nga tumanon nimo ang imong gisaad nako. Kun mahitabo kini, mahimo ko nga buotan nimong asawa,” matud sa dalaga.

Misamot kainit ang ilang pagparayganay. “Kaadlawon pa man, wala bay dapit dinhi nga makalugar ta’g maayo?” gisukna ni Elmer si Marie.

“Dali sunod nako, dunay bakanteng payag diha sa unahan. Didto sa payag, gitagbaw na usab nila ni Elmer ug Marie ang ilang kaugalingon taliwala sa kabugnaw sa huyohoy.

“I love you Mar, isaad nako nimo nga tinud-on nako ang akong pasalig nga ikaw ang himoon ko nga asawa,” matud ni Elmer human sa ilang dinali-dali nga kalipay.

Wala dayon molakaw si Elmer. Gihuwat niya nga mahigmata na ang apohan ni Marie. “Nganong wala pa man ka molakaw?” gisukna ni Marie ang PUJ driver.

“Imatuod nako nimo nga wala ko magkomedya sa akong giingon nga pangasaw-on ko ikaw. Akong tug-anan ang imong lola sa akong tinguha,” ni Elmer pa.

Daw gilumsan sa kalipay ang kasing-kasing ni Marie nga nakadungog sa maong mga pulong. Nagginaksanay na usab sila samtang nagglingkud sa front seat sa PUJ. (Kataposan)