Ang dayong

Si Andro ang presidente sa kahugpongan sa mga tigulang sa barangay Kandiis sa lungsod sa Jasaan sakop sa lalawigan sa Misamis Oriental. Disidido gayod siyang mapalambo ang kaugmaon sa mga tigulang bisan na lang sa ulahing mga adlaw sa ilang kinabuhi. Sama kaniya nga usa na usab ka tigulang ug kinsa man ang molantaw sa ilang kaugmaon.

Dinhi sa barangay Kandiis, daghan kining mga tigulang nga matawag nga walay kangho kun hisgotan ang inadlaw nilang panginahanglan matag adlaw. Maayo man kini si Andro kay duna man siya’y gadaton nga pension sa gobyerno pinaagi sa SSS. Ang gilantaw karon ni Andro, mao kining mga tigulang nga wala gayod intawoy diyamo kun hisgotan ang ilang panginabuhi. Gawas pa niini, nakita ni Andro ang dakong pagkulang sa mga tigulang panahon kun sila magsakit ilabi na kun itumod na sila sa ilang kataposang pahulayan.

Usa sa mga nahunahuna ni Andro mao ang pag-agni sa mga tigulang nga magpasakop sa ilang dayong. Basin pinaagi niini, matibhangan ang kalisod sa usa ka tigulang.

“Mga igsuon, kinahanglan nga kitang mga tigulang magpasakop sa kapunongan sa dayong, aron makatabang kita sa atong kauban ug labaw na gyod sa atong kaugalingon,” pulong ni Andro.

“Dinhi, akong naaninaw kun unsa ang kamahinungdanon sa panaghiusa. Angay natong masayran nga dili ang tawo mabuhi kun mag-inusara lang siya dinhi sa kalibotan. Hinaot, inyong masabtan kay kining tanan alang ra sa atong kaayohan.”

Mituhop sa alimpatakan sa mga sakop ang gisulti ni Andro, busa, tungod niini, halos ang tanan nagpasakop. Gibati og garbo si Andro nga tungod kaniya misamot ang pagdaghan sa mga sakop sa Senior Citizens ilabi na dihang nasayran nila nga duna nay dayong gitukod ni Andro.

Unya nasulayan ang katakos pagpamuno ni Andro sa senior citizens. Unya usa ka adlaw niana, dunay nagpahibalo kaniya nga dunay usa ka senior citizen ang mipanaw ngadto sa pikas nga kalibotan. Ug gawas sa pagpasakop sa senior citizen, sakop pa gayod sa dayong ang nahingtungdan, milihok dayon si Andro.

Ug tungod sa prinsipyo sa dayong, daghan sa mga sakop, bisan kadtong dili pa sakop, mitabang ang tawo pagbuhat sa gikinahanglan nga buluhaton. Naay mga sakop nga nagdalag kahoy, mga pagkaon para magamit sa nahingtungdan.

Si Andro ang nangunay sa pagpahiluna sa mga hinabang paingon sa nahingtungdan. Ang kapitan sa barangay Kandiis nakadayeg sa gibuhat ni Andro ilabi na nga nasayran niini nga si Andro migamit na gayod sa kaugalingon kuwarta para matabangan ang nahingtungdan ilabi na ang mga sakop sa pamilya nga nahibilin niini.

Gitunol ni Andro ang tseke silbing hinabang ni Andro. Nagkantidad kini nga lima ka libo gikan gayod sa iyang kaugalingong bulsa. Kini sa tuyo lang nga mahimo kining ihemplo sa tanang sakop nga magpasakop                sa senior citizen ug ilabi na usab sa             dayong.

Ug panahon na sa pagtumod sa iyang kataposang pahulayan si Andro nagkanayon:

“Mga igsuon ko, dako kaayo ang akong pagpasalamat nga nahimong malamposon ang gihimo natong pagduyog sa nahingtungdan kay pinaagi niini, nahimong malamposon usab ang pagpahaluna sa atong sakop nga mipanaw na sa iyang kataposang pahulayan. Ako isip inyong pangulo sa atong kahugpongan, dili mahikalimot sa inyong gihatag nga hinabang kay pinaagi niini, nahimong mahapsay ug naduyogan ang kasub-anan sa atong igsuon nga mipanaw na sa laing kalibotan. Hinaot nga dili kamo mausab kay pinaagi niini, magpadayon ang kalig-on sa dayong dinhi sa atong dapit.”

Human sa kamatayon niadtong usa ka senior citizen ug sakop usab sa dayong, misamot pagbul-og kadtong mga tawo nga buot magpasakop sa senior citizen ug dayong diha sa buhatan ni Andro. Naglaom si Andro nga sa molabay pang katuigan, halos ang tanang tawo diha sa barangay Kandiis, masakop na sa kahugpongan sa Senior Citizens ug dayong. (Kataposan)