Bawion ko ang imong gugma

Gula 24

“Nakaseguro ka kaha nga ikaw ra gyu’y babaye sa kinabuhi sa imong hinigugma karon nga nagkalagyo kamo? Unsay imong kasayoran kun may lain siyang gikabuangan didto?”

“Naa ra niya kun magluib siya sa among gugma. Basta ako, magpabilin kong magtamod sa among gikasabotan.”

“Nakadayeg ko sa imong baroganan, Annie. Ang sama kanimong matang sa babaye maoy akong gipangita.”

“Sorry gyud kaayo, Melvin. Dili ko makadawat sa imong gugma.”

“Wa ka ba gyud diay pagbati nako?”

“Nga-nganong nakapangutana ka niana?”

“Gusto lang kong masayod.”

Naghinuktok sa makadiyot si Annie. Unya misantop sa iyang hunahuna nga angay niyang sultihan si Melvin sa tinuod aron dili kini magsalig. Aron dili maglaom. Nagtuo siya nga pinaagi niini, dili na gayod magsamok si Melvin kaniya.

“Tubaga ko, An,” ni Melvin pa nga misikdo sa iyang kahimungawong.

“Gikasubo ko, Melvin,” ni Annie pa. “Pero angay lang usab tingali nga masayod ka gyud sa tinuod. Kun gugma maoy hisgotan, wala gyud akoy pagbati alang nimo. Usa lang ka higala ang pag-ila ko nimo. Usa ray akong gihigugma ug kana mao si Edelmar.”

Pagkadungog ni Melvin sa maong mga pulong, wala madugay nanamilit kini. Huyhoy ang mga abaga sa ulitawo nga mikanaog sa pinuy-anan nila ni Annie.

Hapit na ang tingbakasyon. Nakadawat og sulat si Annie gikan kang Edelmar. Nalipay ang dalaga. Iya dayon kining giablihan ug gibasa. -- Sumpayan pa