Nangita sa marka

Nganong naghilak man na si Bunso (akong tawag sa kinamanghuran namong anak nga lalaki?) “Di man mokaon kun dili fried chicken ang sud-an,” tubag sa akong asawa.

“Unya, fried chicken man na naa sa plato, unsa pa may iyang gipangita?”

“Di man sab siya ana kay pinalit lang kuno nako sa tindahan. Kay ang iyang gusto kanang niluto nako o kaha sa McDonald.”

“Naa pa man kahay manok sa ref, luto-i na lang na aron di na ma-late sa eskuwela,” matud ko.

Ingon niana ang among bunso kada buntag sa iyang pamahaw una moadto sa eskwela. Siyete anyos pa lang siya ug dili gyud mokaon og laing sud-an. Magluto mi’g baboy, o kaha, mag-utan mi, di na siya mokaon. Kinahanglan lutoan pa na siya sa iyang inahan og manok, (fried chicken).

Kanang mangaon mi sa gawas, adto gyud mi sa McDonald kun kauban siya, kay kun sa lain nga restawran mosulod, magpapalit man siya og iyaha sa McDonald. Andaman gyud na siya sa akong asawa og manok anha sa ref kay bisan unsay among sud-an, di man siya mokaon gawas sa fried chicken nga luto ni mama niya.

Unya, usa ka higayon, didto sa birthday party ang akong anak nga dalaga. Sa pagpamauli na, gipadad-an siya og mga piniritong manok ug may litson pang baboy. Sa iyang pag-abot, nagtan-aw pa kaming magtiayon sa TV.

“Pa, Ma, pangaon una mo kay niay akong dala nga litson baboy ug mga fried chicken. Akong pukawon si Kid kay niay mga fried chicken.”

“Ayaw na lang na’g pukawa kay mag-purihisyo na sad na kay mangayo og McDonald fried chicken,” matud sa inahan.

“Kay ngano man og akong ingnon nga sa McDonald ni?”

“Na hala, sige,” tubag sa inahan.

Busa gipukaw sa dalaga si bunso.

“Kid, niay dala nakong mga fried chicken, Kid.”

Mipiratpirat una ang mga mata sa bata una namulong, “McDonald ba na?”

“McDonald ni, Kid.”

“Bi, akong tan-awon,” dayong suling niya sa mga fried chicken diha sa plastic bag. “Di man ni McDonald. Bi, hain mang marka?”

Labihan namong pangatawa kay nangita pa man si bunso sa marka o trade mark. –Kataposan