Bawion ko ang imong gugma

“Maayo ra gyud nga mao kanay imong gihimo. Kay ako ra ba, wa koy pagsalig sa linihokan niadtong tawhana. Mora’g huwabon.”

“Mao sab bitaw kanay akong namatikdan niya, Nay. Presko ra siya kaayo. Bag-ohay pa gud ming nagkaila unya nangulitawo na siya dayon nako. Giingnan ra ba ko niya, Nay, nga wa kuno siya’y labot sa relasyon namo ni Edelmar. Okey ra kuno para niya kun higugmaon nako siya bisan dili sama kadako sa paghigugma nako kang Edelmar.”

“Nakasulti siya niana?”

“Oo. Mora bag ubos ra kaayo ang iyang pagtan-aw sa akong pagka babaye. Abi kay propesyonal man siya ug ako high school graduate ra intawon. Pero mora’g milugak siya, Nay, dihang akong gidaygan nga dili ko makaluib sa panumpa namo ni Edelmar.”

“Husto ang imong gibuhat, Anak. Hinumdomi gyud nga may hinigugma ka na. Kadto ra ba si Edelmar, buotan gyud kaayo tong bataa. Kadto maoy pakasli. Ayaw na pangitag lain.”

Gitamod ni Annie ang gisulti ni Nang Karing. Wala siya magpadani sa laing lalaki. Gawas kang Melvin, may daghan pang mga lalaki nga misulay sa pagpaninguha kaniya. Pero silang tanan iyang gibalibaran. Dili siya buot nga makabaton og komplikasyon ang iyang lovelife.

Sa tanan niyang maghahalad, si Melvin ang milahutay. Kanunay kining mamisita kaniya. Usahay, partikular nga mga butang ang ilang panagsultihan. Apan may mga higayon gayod nga dili makapugong ang ulitawo paglakbit bahin sa gugma nga gihalad niini kaniya. Apan ang iyang gibalibad kang Melvin sa sinugdanan mao ra gihapon ang iyang gisubli pagbalibad ngadto sa ulitawo sa matag higayon nga maghisgot kini bahin sa gugma. -- Sumpayan pa