“Dili ko una ikaw pugson sa pagkakaron, Xenia,” ni Reno pa. “Hatagan ko ikaw’g higayon sa pagtimbangtimbang sa akong gisulti. Ug hinaot nga sa akong pagbalik dinhi makadesisyon ka na.” Buntag nang nakapauli si Xenia sa iyang gipuy-an sa Quiot. Sa iyang pag-abot sa balay, midiretso siya sa iyang lawak. Gitangtang niya ang mga salimbong sa iyang lawas. Dihang bra ug panty nalang ang nahibiling hapin sa iyang lawas, mihigda siya sa kama aron matulog.
Apan wala makatulog si Xenia. Gihasol ang iyang hunahuna sa gisulti ni Reno kaniya kagabii. Kun tinuod nga may mga tawo nga nagtinguhang daotan sa kinabuhi ni Reno, duna gyod kini bug-at nga hinungdan. Ug kun tinuod man nga nag-ungaw sa peligro ang kinabuhi ni Reno, samot nang dili gyod siya angay mokuyog niini sa pagbiya sa Sugbo kay tingalig lakip ang iyang kinabuhi mabutang sa kakuyaw.
Pagkapalis, nakugang si Xenia kay nahitungha man si Reno sa iyang gipuy-an. May dala kining brief case.
“Di na ko makapaabot nga unyang gabii pa ta magkita didto sa club,” ni Reno pa. “Maong mianhi na lang ko sa imong gipuy-an.” -- Sumpayan pa