Ihangad sa langit ang maong problema

Si Missy usa ka miyembro sa sorrority kung diin ilang hutdon paghipos ang mga tawong hinungdan sa kalisod ug kagubot ning maong nasud. Siya kay nag-istar sa Cagayan de Oro City ug hanas sa paggamit sa butang nga scalpel sa pagkitil sa kinabuhi sa mga ihemplo ni Hudas.

Sa pagbalhin niya dinhi sa Sugbo aron sa paglikay sa maong binuhatan nahimamat niya ang usa ka lalaking nahimong dakong parte sa iyang kinabuhi diin silang duha nagtambayayong sa kaharuhay, kasakit ug kalisud sa ilang kaminyoon.

Simple ug dili makabuak og panaksan kung imong tan-awon si Missy wala gayu'y nakahibalo kung kinsa ug unsa siya sa tinuod nga kinabuhi.

Apan miabot ang panahon nga nahibaw-an ug nakita sa iyang mga mata ang kagubot nga nahitabo kabahin sa pamilya sa iyang bana. Nagpakahilom lang siya sa sinugdanan pero nakaingon sa iyang kaugalingon nga bisan diay ning maong dapit sa Sugbo aduna pa pud diay siya'y angayang tapuson.

Ug sa wala mahibaw-i nausab sa ikaduha nga panahon ang kagubot nga nahitabo sa maong pamilya. Nakita niya ang tanan, kung gi-unsa pagtratar sa apohan ang pamilya sa iyang bana. Gidad-an sila og Samurai giti-unan og pistula ang iyang ugangan asta ang iyang     bana.

Dili lalim ang tumang kakulba nga iyang gibati. Buot man siyang mogawas nga sa pikas nga pultahan moagi apan wala gayud siyay mahimo kay gipugngan siya sa mga silingan tungod kay aduna siyay gisabak. Didto na gayod siya nakahukom nga kung mahitabo nga adunay mangamatay sa maong pamilya dili na gayod siya magpakahilom. Siya na mismo ang motapos sa maong panghitabo.

"Ma, dili ko gusto nga maangin ka ning maong away sa among pamilya, magpalayo na kita dinhing dapita alang sa atong umaabot nga anak," matud pa sa lalaki.

"Daddy, nakita ko ang tanan nga panghitabo ug bisan ako dili ko itugot nga usa kanato mahanaw ning kalibutana tungod lang sa usa ka demonyo nga naghatag og kagubot. Kung gusto kang magpalayo kita imo kanang desisyon apan dili ako magpakahilom kung adunay mahitabo kaninyo hilabi na kanimo. Ako gayod mismo ang mopatay ug tapuson ko ang kinabuhi sa imong apohan". Tubag ni Missy.

"Unsay buot mong ipasabot ma? Nganong isog kaman kaayong mibuhi anang istoryaha, yuna ra aduna kabay gitago kanako? Sultihi ako sa tinuod? Kinsa ug unsa ka man gayud diay ma? Dugay ko nang nabatyagan nga aduna kay lihok nga gi-control bisan gani ang imong mga barkada makita ko sa ilang mga lihok nga dili sila ordinaryo".

"Oo, tinuod ka diha Pa, dili kami ordinaryo apan milikay na ako sa maong grupo kay dili ko gustong mamantsahan ko pag-usab ang akong mga kamot. Gusto kong magbag-o", ingon pa ni Missy.

"Ang buot mong ipasabot, usa ka kriminal, nakapatay ka na sa imong isigkatawo? Apan sa unang pamaagi? Naglibog nako, Ma. Usahay makadungog ako sa imong mga kauban nga tawagon ka og laing ngalan?" ... pangutana nga wala matiwas.

"Unsa nga ngalan? Scalpel? O, ako si Ms. Scalpel, ang babayeng hanas sa pagamit sa maong butang aron sa pagpatay pero usbon ko kanimo dili ko mopatay og tawong maayo ang binuhatan," ingon pa ni Missy.

"Ma, ayaw ibutang ang balaod sa imong mga kamot, moabot ra ang panahon nga mamatay kanang akong apohan pero dili pinaagi kanato. Sa pagkakaron pasakahan lang sa nato siya og kaso aron matanggong siya sa prisohan".

Ug sa wala damha namatay ra gayud ang maong apuhan tungod sa atake nga wala man lang nakig-istorya sa anak ug sa iyang mga apo. Ginoo ra gayud ang nag-igo sa tanan. Ug nakaingon gayud si Missy ug ang iyang bana sa ilang kaugalingon nga ang tanang problema adunay solusyon. Tawga lang ang ngalan sa Ginoo aron tabangan kita, ihangad lang sa langit ang maong mga problema. (Katapusan)