Gula 20
“Sa unsang hinungdan, An?”
“May hinigugma na ko, ug nasayod si Lea niana.”
“Kadto tingalig giingon ni Agaw Lea nga tua karon sa Ormoc?”
“Oo. Siya si Edelmar. Miadto siya sa Ormoc aron mopadayon pag-eskuyla sa kolehiyo. Siya ang akong hinigugma, Melvin.”
“Wa koy labot sa inyong relasyon, An. Ang gusto ko lang nga higugmaon mo usab ako bisan dili sama kadako sa paghigugma mo kaniya.”
“Dili ako ingon niana nga matang sa pagka babaye, Melvin. Sayran ko ikaw nga dili ug dili ako makahimo pagluib sa gipanumpaan namo ni Edelmar.”
“Okey. Di ko mamugos. Pero may ihangyo lang ko nimo. Mahimo ba?”
“U-unsa kana?”
“Mahimo bang bisitahan ko ikaw pag-usab? Kun dili ka makadawat sa akong gugma, okey lang. Gusto lang kong magkahigala ta. Bakasyonista lang ko dinhi sa Sugbo. Laay ang akong kinabuhi kun dili ko makabaton og higala.”
Wala motingog si Annie. Iyang gitimbang-timbang ang gisulti ni Melvin.
“Mahimo ba, Annie?” Gisukna siya ni Melvin pagkilab sa pipila ka daklit.
“Nga-nganong dili?” ni Annie pa. “Makighigala ra man kaha ka?”
“Nangulitawo to nimong lalakiha?” Gipangutana si Annie sa iyang inahan dihang nakalakaw na si Melvin.
“Mao lagi, Nay,” tubag ni Annie.
“Taga diin man to siya?”
“Taga Masbate. Ig-agaw to ni Lea. Mibakasyon lang to dinhi sa Sugbo samtang nagpaabot sa resulta sa iyang pagkuha sa board exam.”“
“Mao ba? Unya, unsa may imong gihimo sa iyang pagpaninguha nimo?”
“Aw, akong giprangkahan nga may hinigugma na ko.” -- Sumpayan pa