Bata pa si Edro, pangandoy na niya ang mosikat sa bisan asa niining natad sa entertainment. Mahimong aktor sa pelikula o usa ka front act sa banda nga Pinoy Rock. Mahimong inila sa T.V., radyo ug mga mantalaan sa umaabot nga adlaw.
Idol niya ang bandang "Eraserheads" ug ang pelikula sama sa "Alega Gang"ang gusto niyang esena kun mahimo na siyang artista. Ganado siyang moakting atubangan sa samin bitbit ang pusil-pusil nga kinit-an niya sa pagpamasura, magtabi-tabi ug magbalitok-balitok.
Tuod man miabot gyud ang adlaw nga misikat si Edro. Nagbansiwag ang iyang nawong sa television, ang iyang ngan sa mga radyo station ug ang iyang pamayhon sa mga mantalaan, nagkawo, nag-jacket og itom, nanigarilyo ug duha kabuok, lupig pay Robin Padilla, nagbitbit og pistola.
Siya ang ulo-estorya sa mga palahubog, mga mananagat, mga saop, mga minero, mga marinero, mga piloto ug mga naghingut-anay sa ilang mga ulo. Ingon man sud sa mga beauty parlor, C.R., mga malls, sidewalks vendors, mga janitors, department stores, hotels ug beach resorts, sa mga tsismoso ug tsismosa, Luzon, Visayas ug Mindanao.
Siya'y labad sa ulo sa gobyerno, armadong kusog sa nasud ug kapolisan tungod sa iyang katulisan daw sa may anting-anting o talisman.
Kusog modagan, kalit mawa ug di na makit-an. Nahimo siyang public enemy No. 1. Nagpatabang na ang kapolisan sa mga saykik, albularyo, ermitanyo ug mananag-an aron lang madakpan nila si Edro, gipatungan pod nilang 50 milyones ang ulo.
Tungod sa kadako sa patong sa ulo ni Edro, kun asa mabalitaan nga tua siya, atakon dayon kini sa mga polis, army, brgy. tanod ug mga civilians. Tunga-tunga sa dan Colon, wa na gyud kaikyas si Edro. Mipungko nalang siya sa punoan sa traffic light, kay bisag asa siya dagan dumogon man gyud siya sa mga binatalyon nga tawo, from the North, to the South. To the East and the West. "Sakto na! Agaraaay!" Misinggit si Edro nga gibira-bira sa mga tawo nga gutom sa reward nga P50 milyones.
Kini ang "Pelikula" ni Edro. Pelikula sa tinuod nga kinabuhi. Walay direktor. Walay writer. Tinuod nga hitabo ... sa iyang damgo. "Kah! kah! kah! Damgo lang diay." Gikutasan si Edro. Nakatug diay siya sa sawog nga lipak sa kawayan sa ilang payag. Bitbit pa niya ang iyang pusil-pusil.
Mibangon siya. Nakita niya sa samin ang iyang nagkadusingot nga batan-on nga nawong. Naumog pod sa singot ang iyang sapot nga gisul-ob. Daw nagpabilin pa niya ang "Daman" morag tinuod gayud iyang damgo. Nakita niya gawas sa bintana ang laing mga bata nga nanagduwa og gubat-gubat.
"Bang! Bang! Bang! Patay naka, ha! patay na ka!" (Katapusan)