“May the best man win,” ni Norman pa.
“Yes,” tubag ni Reno.“May the best man win.”
Ug naglamanohay sila sa atubangan ni Xenia. Nakapasalamat si Xenia nga dili trouble maker ang duha ka lalaking nangulitawo kaniya.
Wala diay siya’y angay kabalak-an.
Usa ka buntag niana, may nabasahan si Xenia sa Banat News nga nakapakugang kaniya.
Ang banner story sa Banat News nag-ingon nga may nahitabong pinusilay tali sa mga elemento sa kapolisan ug sa mga sakop sa Salandanan Robbery Group nga mitulis sa usa ka dakong tindahan atbang sa City Hall.
Napatay ang tanang mga tulisan apan napatyan usab ang kapolisan. Ang nakapakugang kang Xenia kay ang polis nga napatay atol sa engkuwentro mao man si PO3 Gordon Racales, ang polis nga iyang silingan sa Quiot nga kaniadto gika-one night stand niya.
Tuod man, sa pagpauli niya sa Quiot nianang buntaga, nakompirmar niya nga si Gordon gayod ang napatay sa mga tulisan. Nagbangutan ang pamilya ni Gordon tungod sa hinanali niining kamatayon. -- Sumpayan pa