May demonyo na

Oy! Wa ka kabalita? nga naospital si Dadoy? Grabe ra ba kuno!" ni Edna ngadto sa iyang silingan nga si Senda. Nag-abot sila sa eskina sa nagkuros nga dalan luyo sa munisipyo sa ilang lungsod. Domingo ron ug gikan si Edna nga nangompra sa merkado. Si Senda padulong pa mangompra karong buntaga.

"Ha? Mao ba?" ni Senda.

"Mao gyud! Nagteks nako iyang kapikas nga si Aiding," ni Edna. Nikalit og kahilom si Senda. Nihangad sa langit. Nitulong luha sa kalipay.

"Salamat Diyos ko. Praise the Lord. Kay gidungog nimo akong pag-ampo!" ni Senda nga nag-isa sa duha ka kamot nga daw nagbayaw ngadto sa langit. Nahingangha si Edna. Nakapanampong sa baba. Ug nisirit na la’g lakaw pauli.

Mortal nga kaaway ni Senda si Dadoy. Silingan ra sila sa baryo Dalipsa. Libakero si Dadoy. Kanunay sawayon niya ang kinaiya ni Senda ug sa iyang kapikas nga si Brendo isip magtutudlo sa saring publiko sa ilang lungsod. Mikomentaryo sab siya nga wa silay pag-ilag utang kabubut-on sa ginikanan ug mga igsoon. Ang ilang gusto kun unsay ilang mapahimuslan sa paryente ug silingan. Di magbawos-bawos.

Tungod kay guwapo si Brendo ug di maayo’g hitsura si Senda, gipalakaw ni Dadoy sa mga silingan nga gilumay niya si Brendo. Gipabarang na niya si Dadoy. Apan wa hidutli. Busa, gidagkot nalang niya ang kaaway. Nagsige siya'g simba kada Domingo.

Si Dadoy may negosyo nga karenderya sa Talamban. Mao ra ni ilang kabuhian. Busa niabag iyang asawa’g mga anak nga sila si Jessica ug Jocelyn nga mga daga na. Mag-ulian sila sa Dalipsa matag Sabado ug Domingo. Usahay di sila mouli. Ug adto na lang manghigda sa ibabaw sa commercial space diin tua ilang karenderya. Labi na’g hagisan sila ni Brendo kun mahubog. Sugo ra sab ni Senda nga hagisan si Dadoy. Kay di gusto’g gubot, motago lang sa ilang balay. Ug nagpa-blotter sa polis iyang kapikas.

Napulo ka adlaw sa ospital si Dadoy. Duna diay siya’y dayabitis. Unya nikumplikar sa iyang baga. Nahimong pneumonia. Kusog man sab lagi moinum. Beer ang maglabi. Apan wa siya’y pilig ilimnon. Kutob sa itunol kun dunay pundokpundok.

Paggawas sa ospital, puwerteng dauta ni Dadoy. Bukog ug panit nalang. Apan naminaw siya’s tambag sa doctor nga di na moinom. Magmintin og tambal sa iyang dayabitis. Unya magpasingot gyud kada adlaw. Si Senda magsige’g mug-ot sa kadismayo nga wa namatay si Dadoy. Saputon siya ug magsurok sa iyang dugo nga makakitang Dadoy nga nagdagandagan tuyok sa plasa sa ilang lungsod. Ang nahitabo dangtag tuig, nahimsog og balik si Dadoy. Namaskulado. Mora na’g si Oscar dela Hoya ang lawas.

Usa ka buntag, nigawas si Dadoy kay mag-ehersisyo. Nigawas sab si Brendo ug Senda. Gitudlo dayon ni Senda si Dadoy kay pahagisan na sab ni Brendo.

"Dadoy kolokoy! Nawong morag lambay!" singgit ni Brendo. Abig mahadlok gihapon si Dadoy.

"Unsa! Andar ka? Dali kay hayag pa kaayo. Klaro ang tawo!" ni Dadoy nga niporma kay makigsumbagay.

Gikamay si Brendo. Nahurot na siguro ang talaw ni Dadoy. Naunsa bang pagkaunsaa nga nitalaw man si Brendo. Niputing itlog. Nikaratil og dagan sulod sa ilang balay. Nanglipaghong si Senda sa kalagot ug kaulaw nga nitalaw iyang bana nga kanhi giilang haring gangis sa ilang baryo. Tataw diay nga ang iyang paisog-isog inartista lang. Tungod sa sugo sa "guwapang" kapikas.

Pagkasunod nga Domingo, wa na nisimba si Senda. Nikuyog sa iyang bana nga nanong og madyong, tong-its ug tseketsa sa ilang Donna.

Tua na siya ni Satanas nag-ampo. Kay wa diay siya dungga sa Ginoo. Daghang silingang makakita niya nga mokalit la’g budlat ang mata nga daw mohuot sa iyang antiyohos. May albularyo nag-ingon nga may demonyo na ang sulod sa lawas ni Senda. (Katapusan)