Bawion ko ang imong gugma

“Ayaw lang laina pagsabot ang akong gisulti, Day, ha,” gikan na usab ni Lea. “Gipasidan-an ko lang ka aron dili ka kaayo masakitan kun ugaling dili motunhay ang relasyon ninyo ni Edelmar gumikan sa inyong panaglagyo.”

Nakahukom si Annie nga manarbaho aron dili na gayod siya magpunay og hunahuna kang Edelmar. Dili na man mosugot ang iyang inahan nga mokuyog siya niini sa pagpaninda og buwad sa Carbon. Ang mga kaubang tindera sa iyang inahan miingon nga dili siya angayan nga maninda og buwad tungod sa talagsaong katahom nga iyang nabatonan.

Giabot na og kalaay si Annie nga mao ra kanunay ang mahibilin sa balay kun ang iyang mga ginikanan atua na sa Carbon ug mang-eskuyla na usab ang iyang mga manghod. Misulay siya pag-apply sa usa ka tindahan og appliances sa Colon nga nag-wanted og saleslady. Gusto usab siyang makatabang sa iyang mga ginikanan sa ilang panginabuhi nga kanunay gigukod sa kawad-on.

Nadawat si Annie sa iyang giaplayan. Apan usa ra ka semana ang iyang giabot sa trabaho. Estrikto kaayo ang tag-iya sa maong tindahan. Diyotay lang sayop, mangasaba gilayon nianang sinultihan nga dili makaon og iring. Bisan kun usa ra ka trabahante ang nakasala, silang tanan maoy kasab-an. Maong wala siya molahutay.

Nangita siya’g laing trabaho. Miaplay siya sa usa ka tindahan og cellphone sa may Osmeña Blvd. Nadawat gihapon siya. Pero wala gihapon siya modilanto. Nakagusto kaniya ang anak sa tag-iya sa maong tindahan. Nangulitawo kini kaniya. May pagka hambugero ra ba kini. Gusto siyang makalikay sa maong lalaki maong mi-resign dayon siya sa iyang trabaho. -- Sumpayan pa