Bugnaw na ang sulod sa aircon nga opisina ni Mr. Felix Andal, HRD Manager sa Green Meadow Emporium ning dakbayan pagsulod ni Elsa. Nakita ni Elsa ang wall clock sa bungbong tungod sa ulohan ni Mr. Andal. Nagtudlo sa oras nga alas otso y media sa buntag.
“Good morning, Sir” ni Elsa. Wa siya magpahiyom. Nasayod na siya nganong gipatawag siya’s iyang manedyer.
Gani gikulbaan siya kun unsa na gyu’y silot ipahamtang sa management kaniya.
“Di lang unta termination!” Hilom siyang nag-ampo.
"Good morning, Miss Lerio. Lingkod" sa manedyer nga nitudlo sa bakanting lingkuranan dikit sa tuong habig sa iyang lamesa. Paglingkod ni Elsa nitindog si Mr. Andal ug niduol sa pultahan. Gi-lock niya ang pultahan aron di maisturbo.
Ikatulo na ning higayon nga gipatawag si Elsa sa manedyer. Tungod kay confidential ilang panag-istoryahan, nabatasan sa manedyer nga trangkahan ang pultahan. Aron way bisan kinsa nga makakalit og sulod sa opisina.
Sa lima ka tuig niyang serbisyo isip salesgirl, regular nga empleyada, sa naasoy'ng department store, katulo na siya gireklamo og customers. Sa unang higayon duha ka tuig pa lang siya sa serbisyo, nasuspenso siyag usa ka bulan, unya way suweldo.
Sa ikaduhang higayon, nasuspenso siyag duha ka bulan, wa gihapoy sweldo. Giagwanta lang niya iyang trabaho isip salesgirl, kay nadiin-diin na siya’g pangaplay.
Duha na ka kompanya iyang naalagaran. Unya taglima ra gyud siya ka tuig. Unya mataktak. Tungod lagi sa depekto ni Elsa sa pagpakigsandurot sa isig ka tawo. Istrikta ug mapahitas-on kaayo siya.
Hapit na mokwarenta ang edad ni Elsa. Unya daga pa siya. Wa pa kaagi og uyab. Kasagaran sa iyang mahigalang lalaki, dili moseryoso niya. Dili kaatraka.
Kamanghuran si Elsa sa pito ka managsuon. Natawo siya sa Dumaguete. Pagkatawo niya, nag-away iyang ginikanan. Wa nadugay, nagkabuwag sila. Kay kuno lahi siyag hitsura nga pagkaanak. Nagduda iyang amahan nga sinuyoran siya’s iyang mama. Nagdako si Elsa nga dinaugdaug sa mga maguwang. Sa pagbuwag sa iyang ginikanan, nagbahin sila sa unom ka anak.
Ang tulo ka lalaki nikuyog sa amahan. Ang tulo ka babaye nikuyog sa inahan. Siya wa dawata sa inahan. Tua siya papuy-a sa iyang lola Teresa, inahan sa iyang mama sa Guihulngan. Daw gi-reject si Elsa sa iyang mga igsoon ug mga ginikanan. Pagtapos niyag hayskul nilangyaw siya.
Tungod sa di maayong kaagi sa gamay pa si Elsa, nagtanom siyag pagdumot sa iyang mga igsoon ug ginikanan. Tungod niini wa siya’y maayong relasyon sa iyang isig ka tawo. Kay gi-reject siya, gusto siya nga mang-reject sab. The best defense is offense, niya pa.
Kadaghanan sa nangreklamo batok niya mga customer. Iyang inistriktahan, insultohon ug bugalbugalan. Nakasugat siyag customer nga gamay'ng babaye. Morag teenager apan propesyonal na diay. Anak pa gyud og abogado. Diha siya nalagoso kay anak og abogado ang ikatulong nireklamo batok niya, dihang sa Green Meadow Emporium na siya nagtrabaho.
"Palit kog Marlboro, Miss. Usa ka kaha," sa batan-ong babaye.
"Gold o Red?" sukot ni Elsa nga nagbarog sa counter.
"Bisag hain lang ana," sa customer.
"Klaroha! Kinsa may manigarilyo? Ikaw? O sinugo kalang?" ni Elsa nga pintok ang tono.
"Gipamalihog lang ko’s kauban sa opisina. Kay may paliton man sab ko dinhi" sa customer.
"Balika didto ang nagsugo nimo. Aron maklaro'g Gold ba o Red! Kay di ra ba mi mo-refund kun magpa-refund ang customer nga di mao ang napalit!" ni Elsa. Suplada ang tono.
"Gold nalang" sa customer.
"Ah way Marlboro!" matud ni Elsa. Pero kita kaayo sa customer nga may Marlboro duha ka klase sulod sa showcase nga bildo. Gikataw-an lang niya ang customer nga nitalikod sa kalagot.
Nikuba pagsamot ang dughan ni Elsa nga nagbasa sa decision sa iyang administrative case nga gipasaka ni Gina Seiner, ang customer nga gamay'ng babaye nga usa diay ka dentista.
"Dismissal for just cause, due to serious misconduct." Maoy katapusan niyang nabasa.
Nanghupaw siya. Nitulo ang luha. Nitindog nga way panamilit sa manedyer.
Sa gawas, nakahukom si Elsa nga magpakiluoy sa manedyer ug isulti niya ang tinood nga hinungdan kun nganong ngil-ad siya’g kinaiya. Kay isaad niyang magbag-o na siya. (Katapusan)