“Gibuhat ko na kana, Xenia. Pero giingnan ko niya nga mobalik lang siya’g puyo sa among balay kun magpasakop ko sa ilang relihiyon. Sukad niadto, wa na ko magpakita niya. Nagplano man gani kong ipa-annul ang among kaminyoon kun...”
“Kun unsa, Norman?”
“Kun dawaton mo ang akong gugma.”
Wala dayon makatingog si Xenia.
“Tinud-anay ang akong gugma nimo, Xenia,” ni Norman pa.
“I’m sorry, Norman,” ni Xenia pa. “Pero dili ko gustong maka-contribute sa hingpit nga pagkaungkag sa imong kaminyoon ngadto sa imong asawa. May mga anak kamo. Kana ang hunahunaa pag-ayo.”
Apan nagpadayon gayod pagpangulitawo si Norman kang Xenia. Nakasabot si Xenia nga dako gayod kaayo ang tinguha niini pag-angkon sa iyang gugma.
Apan nagpugong gayod si Xenia. Dili siya gustong maguba sa hingpit ang pamilya ni Norman tungod kaniya.
Dihay higayon nga gidala si Xenia ni Norman sa usa ka pribadong lawak. Wala siya magmakuli pagkuyog niini ngalan nga iya kining kustomer sa UCV’s Sky Is The Limit nga nagkinahanglan sa pribado niyang serbisyo. -- Sumpayan pa